فؤاد حداد كبير شعراء العامّية في مصر

هو فؤاد سليم أمين حدّاد، المولود بحيّ الظاهر بالقاهرة في 28 تشرين الأوّل / أكتوبر1928، والده من بلدة «عبيه» بلبنان، وأسرته مسيحيّة بروتستانتيّة. اهتمّ الوالدان بتعليم سليم حتّى تخرّج من الجامعة الأميركيّة في بيروت، متخصّصاً في الرياضيّات الماليّة، وجاء إلى القاهرة ليعمل مدرّساً بكليّة التّجارة بجامعة فؤاد الأوّل - جامعة القاهرة حاليّاً - ويحصل على لقب البكويّة، وعندما أُنشئت نقابة التجاريّين في مصر، منحتْه العضويّة رقم واحد.

أمّا والدته زكيّة، فهي من مواليد القاهرة في 19 حزيران / يونيو 1907، جاء أجدادها السريان الكاثوليك إلى مصر واستقرّوا فيها وولد أبواها في القاهرة، أبوها من عائلة أسود التي جاءت من دمشق الشام وأمّها من عائلة بولاد من حلب، وفي المعتقل تحوّل «فؤاد حدّاد» إلى الإسلام.

يقول فؤاد حدّاد عن نفسه:

«أنا مصريّ من أصلٍ شاميّ لا يغتفر احتشامي

هينطلق من حيشاني صوت الجموع المفرَد»

تعلّم في مدرسة الفرير ثمّ مدرسة الليسّيه الفرنسيّتين، اطّلع مبكّراً على التراث الشعريّ العربيّ في مكتبة والده، وكان منذ طفولته يريد أن يصبح شاعراً، ولمّا سُئل عن السبب أجاب «لأساعد النّاس حتى تكون حياتهم أفضل».

بدأ فؤاد حدّاد النشاط الأدبيّ تزامناً مع نشاطه السياسيّ كشيوعيّ حتى النّخاع، عام 1944 وهو تلميذٌ بالمدرسة حيث كان ينشر قصائده في الدوريّات الأدبيّة والجرائد الحزبيّة، وأوّل دواوينه كان اسمه «أفرجوا عن المسجونين السياسيّين» وقد اختار هذا الاسم الجريء في تلك الفترة انطلاقاً من موقفٍ وطنيٍّ وسياسيّ واضح، وقد صدر هذا الديوان عام 1952 تحت اسم «أحرار وراء القضبان» وبسبب الرقابة والاسم الأصليّ صار اسماً للمقدّمة.

اعتُقل فؤاد حدّاد للمرّة الأولى من عام 1953 إلى 1956 وقد أفرج عنه لمدّة شهرين فقط عام 1954، وخرج من المعتقل ليكتب كما لم يكتب من قبل، وصدر ديوانه الثاني «حنبْني السدّ»، وكتب بعدها محتفياً بكلّ حركات التحرّر الوطنيّ من كلّ أنحاء العالم.

اعتُقل فؤاد حدّاد للمرّة الثانية من نيسان / أبريل 1959 إلى نيسان / أبريل 1964 وفى هذه السنوات الخمس كتب كثيراً رغم التعذيب والقهر، بل تفجّرت بداخله طاقاتٌ فذّة وصنعتْ تراثاً فريداً، ففي أيّام التعذيب في معتقل العَزَب، قرّر أن يكتب كلّ يوم قصيدة ليرفع من الروح المعنويّة لزملائه.

على مدار حياته، تنقّل فؤاد حدّاد بين الشيوعيّة والصوفيّة:

«ياللي كفرت بالاشتراكيّة

والمكنة التشيكوسلوفاكيّة

بالتّذكرة كما بالتّزكية

بالمتشقلب بالمعدول

دلدول دلدول

كان عندي طاقيّة

طاقيّة شقيّة

من شقاوتها بقتْ طرطور»

من وحي تهاويم التصوّف وملكوته، كتب ديوان «المسحّراتي» الذي لحّنه وغنّاه سيّد مكّاوي، وديوان «الحضرة الزكيّة»:

«يا أهل الأمانة والنّدى والشوق، يا مجمّعين

الشمل في الحضرة الزكيّة، أوِّل ما نبدي

القول نصلّي على النّبي

المصطفى سيّد ولد عدنان

كان ياما كان الليل وكان الليل

أخضر مندِّي بيسمع القرآن»

لقد كتب فؤاد عن كلّ شيء وعن كُل الناس، بنفَسٍ مصريٍّ وعربيّ وأمميّ، كانت فلسطين همّه الشخصيّ، وكان «الغلابة» شاغله الأكبر، وما بين هذا وذاك، أسّس لشعر العاميّة المصريّة الحديث، يقول عن نفسِه:

«أنا والد الشّعرا فؤاد حدّاد

أيوه أنا الوالد وياما ولاد

أبالِسه ربّيتهم بكلّ وداد

بعدِسّه تلميذ أولي وإعداد، تسالي»

وكانت آخر أبياته التي تركها على المكتب ليلة وفاته، يوم الأول من تشرين الثاني / نوفمبر1985، هي الملخّص الوافي لسيرته:

«مات اللي كان حالف يموت ولا يقطَع دابر

أمل المساكين في الأكابر»

1

 

أنا الأديب وأبو الأدبا

اسمي بإذن الله خالد

وشعري مفرود الرقبة

زي الألف

ورقم واحد

والساعة 6 في العتبة

 

2

 

يا اسمر يا روحي يا امتداد النيل

الثانية مشيت قد ألفين ميل

على قافية متقدر لها تحميل

ألفين سنة ويفضل كلامي جميل

 

3

 

أنا مصري من أصل شامي لا يغتفر احتشامي

هينطلق من حيشاني صوت الجموع المفرد

 

4

 

منين يا عم إبراهيم؟

قال لي أنا من الطير

يا ميت صباح النعيم

ويا ميت صباح الخير

ما أحلى الشقا لما أشقى

بقلب أعقل وأشقى

من العقول الشقيّة

أعدل جناح الطاقية

وافتح عراوي الصدير

لسه في حياتي بقيّة

تسأل عيوني اللي عاشقة

الطير مزاج والا نشأة؟

ولا الغرام اللي جابني

والجو صاحي عجبني

أقول لك الحق يا ابني

كلنا من الطير

 

5

 

آه وآه ويا فرحة قلبي

كنت طير وصبحت مراكبي

يجناحينْ وحملت مراكبي

يا هنايا في ريح النيلْ

وابتسام الفجر دليل

 

يا حياتي وسر حناني

لما افتح لك احْضاني

كل شط يلاقي التاني

والعطاشى تلاقي سبيلْ

والليالي تقول لك آه

آه وآه ويا فرحة قلبي

 

في الندى عسّلت شويَّة

جاني طيفك طل عليه

ضّي قلبي وضّي عينيَّه

مبتسم في الطل كحيلْ

طفل غاوي بداوي الآه

 

كل شط لقيته طارح

حلم بكره وحلم امبارحْ

والقلوبْ كلها تتصالحْ

في الغناوي والمواويلْ

اللي تعلى معاها الآه

آه وآه ويا فرحة قلبي

 

6

 

بطّل تلومني على النهاية السعيدة

ولا أنت مستكتر على المسكين.. بطيخة ع السكين!

 

7

 

مســحـراتي يا مؤمنين

مـنـقـراتي مد الأنين

الله على رعشة الحنين

عمره ما كان الأمل ضنين

يا قدس نوارة السنين

كأن عيني في ميتمي

يا قدس ما يحتمل دمي

الا أشوفك وأرتمي

وأبوس ترابك المريمي

أبويا وابني على فمي

ما اتوهش يا قدس في المطال

يا عاصرة مهجة الرجال

سقاكِ من دمعته الهلال

يا قدس يا سبحة الشقا

الأعمى في سجدتك رأى

والفجر من صخرتك سقى

يا قدس تتفجر الجراح

والصبر حرب وأيوب صلاح

يا أخت من مكة والبطاح

قلبي انضرب للعرب وصاح

لابد من فتح في الصباح

المشي طاب لي

والدق على طبلي

ناس كانوا قبلي

قالوا في الأمثال:

«الرجل تدب مطـرح ما تحب»

وأنا صنعتي مســحـراتي في البلد جوال

حبيت ودبيت كما العاشق ليالي طوال

وكل شبر وحتة من بلدي

حتة من كبدي

حته من موال:

لما تقول أجمل ما في الدنيا، الميه للعطشان

يعرفوك عربي

أما للراوي ريحة البرتقان في مداخل يافا

يعرفوك عربي

لما تقول ابني اتولد لاجئ

يعرفوك عربي

لما تقول يا رب

يعرفوك عربي

لما تباشر جهادك، ترمى أوتادك

في قلب دابح ولادك

يعرفوك عربي

 

8

 

مفيش في الأغاني كده ومش كده

يفرقنا عن بعض بالشكل ده

يا مصر اللي جايبة الشجر من زمان

وشايلة الضفاير على البرتقان

وقبل الأوان اللي قبل الأوان

بتحييني أنفاسك المُسعدة

 

بحبك كأني طليق العنان

وزي العجوز اللي دق البيبان

وزي الكتاب اللي كان يا ما كان

وزي الرصيف اللي في السيدة

 

أنا اللي زرعت البيوت والعيدان

ما يمنعش عقلي شوية جنان

هيرجع لاسمك رنين الحنان

قتيل المحبة يلبي الندا

 

9

 

المطرقة ناحت على السندان

اتشكلت كتل الحديد.. قضبان

الرأسمالي.. بيملك الآلة

الرأسمالي.. بيسجن الإنسان

 

الرأسمالي بيملك الآلة

أغلال.. على استغلال

على بطالة

يجعل حياتك يا فقير عالة

ويموتك.. ويبيع لك الأكفان

 

الرأسمالي بيملك الآلة

الرأسمالي.. بيقتل الإنسان

 

10

 

يا ليل من الحب صاحي

من الشقا نعسان

على كل طوبة ندى

وشذى وأمل إنسان

من الظلام فيه الضي

ومن العطش فيه الري

من ألف حي وحي

من ألف عام

وأنا عايش في الزمان الجاي

 

11

 

الدمـوع فيها الصَرَع والغلّ

راضي مش راضي الدموع بتذلّ

تشبه الشكوى لغير الله

 

12

 

مقطع من موال الشيخ سعيد

 

كان يا ما كان شيخ سعيد أسمر عيونه وساع

في قعدته مرحبا والخطوة جدّ وساع

تعطف عليه الجنينة كل ساعة وساع

وتدور عليه الموالد

تدور عليه الموالد شيخ سعيد يا سعيد

مين غيرك اللي ح يجبر خاطر المكسور

من سبحتك يجري حمص يملا جرن صعيد

رقابينا يا هل ترى تشهد شهادة زور

يا شيخ سعيد الشجر بيندّي لما تزور

وتلالي في المندرة تفتح لفوق وبعيد

تعزف على الجندره تبسط هدوم العيد

قال يا ولد يا اللي ماشي هناك على الحيطة

والسقف زي السحالي طُل وإسعى لي

 

ح اعلمك صنعة الموال وطباته

إوعى توسوس توشوش خد نفس عالي

ودحرج النور على السلم وطباته

بعيد ولفوق

قلنا القوافي كتيرة قالوا طب هاتوا

طلع لهم شيخ سعيد في أولى طبعاته

والجمهورية بتطلع ويا طلعاته

شاور بكمه وجاب لك شارع الصاغة

وبعتره في ميدان المادنة والساعة

قال كل مين يسمعوني يفهموني كمان

عاشق بلادي بعبلها وبهبلها كمان

في العين وفِى الحلم واللي ف بالها أحلى كمان

قلنا القوافي كتيرة وربنا يرزق

باعلمك زهوة الموال وشباته

سبح بعرفه وضرب في الجو لباته

نادى حصان أبو زيد ع الشمس لباته

باتوا العرب فِ الترب ع الذل لم باته

بعت لهم كهربائي الجن لمباته

 

قلنا القوافي كتير وربنا يرزق

باعلمك صنعة المنقار مع الفسدق

علشان تقول عني يا فؤاد كلام يصدق

مش برضه اسمك فؤاد يا حته من كبدي

تقول لهم شيخ سعيد والقافية شيخ دسُّق

كان بوسطجي مسحراتي في الندى الأبدي

ما كانش يقبل مماينة وكان جريء بلدي

حتى الأمير في الطلاينه كان جريء بلدي

أفضل أموت م العطش إلا إن جا ريق بلدي

قمر الصحاري بطش بمحرم الموال

عقلك بشمس إتلطش طمني كيف الحال

سمعني تحت الرحال برهوم في الحارة

نوح البنات العذارى يا أبو زيد هلال

ندا العتابا وردة يابا بالشامي

«نحنا فرغ صبرنا

لما اتملا خيرنا

ماشيين على قبرنا

روحنا في مناخيرنا

إطفي النجف من عماد الدين وبرشامي

ح اسمعك يا فؤاد موال من الأصلي

إذا خيال القمر في الماء تَرَقص لي

يا ليل يا ليل غيهبي يا ليل غبي يا ليل

الإنجليزي هابي و أنا شيخ سعيد يا ليل

وباعرف إن الظلام اسمه ظلام يا ليل

واسمه الكتوم والقتام واسقي المدام يا ليل

أنا باعرف إن الظلام اسمه نواهنّ

وبعدهن شهورا لا نراهنّ

على الجميلات من بعد الهوى هنّا

 

13

 

الجحيم يساوي قسوة بني آدم

الجنه فرط الحنان

النور في كل آوان

 

 

14

 

مقطع من قصيدة استشهاد جمال عبد الناصر

 

يا حضن مصري يا طلعة فجر يا ريّس

مع السلامة يا والد يا أحنّ شهيد

آدي الرقابي ودي الأعلام بتتنكّس

فين طلّتك في الدقايق تسبق المواعيد

والابتسامة اللي أحلي من السلام بالإيد

يا معانا في كل فرحة ومعركة وجديد

أؤمر لي بحقوقي وهدوم الولاد في العيد

والمجانيّة ومرايل بيضا والأناشيد

والصبر ما يغلبهش الذلّ والتنهيد

فرّقت ورقك وقلت الكلّ يكتب لي

من البحيرة من الشرقيّة من قبلي

أنا خفت لو أم تنده وتلاقيني بعيد

ياما السفر والبريد ياما الأمل بدري

ياما الغلابة تريد منشيّة البكري

وياما قلبك خفق من رحمته وضناه

كل الآهات شعب واحد يا حبيب الله

يا صادق العقل واكتاف الفواعليّة

صدر الشهامة اللي أكبر منها حنيّة

نسّيتنا أيّام ما كانت راسنا محنيّة

آدي المدارس ودي الشوارع ودي العمال

والفلاحين الأحبّة أمّتك ياجمال

داوم علي الحق ياكبير العرب داوم

عشر ليالي بضحاها وانت مش نايم

خلّينا نعلي بحناجر تطلبك ودموع

يا قوة الشعب يا قلب الوطن مسموع

يا رؤية الذاكرة يا واحد الجماهير

صوتك نبع من نبات نادي وشرف وضمير

من ملحمة ومن دموع زي النهاردة كتير

خليني أسأل دموعي قبل ما اكتبها

وليل ماكانش انتهي وأيّام نعتّبها

واسمك يدور في المنارة خالد الإحساس

مين اللي أكبر؟ مقامك في قلوب الناس

والا مقامهم في قلبك؟

15

 

كان ياما كان بكره

يا حلم ما بتخلصش منه وداني

كل اللي قبلي مد حبلي وناداني

وقالوا لي مالك يا حبيبنا يا سيد

تطرح دموعك كل يوم وتعيّد

أنا قلت يا أهل الزمان اللي فات

تضحك معاكم كلكم وتزوّد

وتبكي منكم كلكم ألحاني

قالوا لي ما تظلمش منا الصفات

احلم معانا بالتبات والنبات

ونادي بالخضري وبالحلواني

وخد حكاية وهات حكاية وكمّل

العود بيضرب والقانون بينمّل

كان ياما كان ود وفرح وتهاني

كانت سنين تتلف زي الضفيرة

كنت الجنايني ومصر فوق الحصيرة

كانت أميرة في العسل والأغاني

 

16

 

عمرك سافرت الفجر

عمرك بكيت

عمرك شقيت من غنوه تسمعها

عمرك لقيت نفسك ومديت لها

خطوة صبا

عمرك شكرت أخوك وسقف البيت

وعيون تودك والنظر واللقمة

عمرك خجلت لأن أطيب منك

انت اللي قادر تنفعه

عمرك سألت سؤال

عمرك كتبت لمنكسر مكتوب

ايدك بترعش لما بيملّي

عمرك بدأت عمل وكنت شباب

عمرك سهرت عليه

عمرك جمعت الصبر والحرقة

عمرك خليت تحت الشجر والنور

عمرك طلبت من الريحان دنيا

عمرك مشيت بين الحبايب مغمّض

في كل خطوه تقول بلادي جميلة

 

17

 

أنا صاحي الفجر وخايف

لا النسمة تكون قلقتها

أنا باسأل عنها لقيتها

الحلوة بتسأل عني

أنا زي الحنة في إيدها

 

18

 

وقعدنا لبعض نحكي

وقسمنا الارغفة

ضحكك يلاقي ضحكي

وقُلِّتك شفا

والليلة مصيّفة

والبدر على الغيطان

يا حلاوة يا حنان

 

الأولة لقيتني، عطشان وانت السبيل

من قلٍّتك سقيتني، وأنا مانساش الجميل

عطشان وانت السبيل

تايه وانت الأمان

يا حلاوة يا حنان

 

يا شابكني.. بعود ريحان

والله ونسمة حبيبي

وحشتني من زمان

 

19

 

الفنانين قالوا لنفسهم ما دام مانقدرش نخلِّد

يبقى نخَلِّل

وهات يا تلاتين حلقة في تلاتين حلقة

لمّا الكلام زهق من نفسه وقال:

من كتر المط.. أنا اتشرمطت*

دُقّي يا مزيكة

 

* تستخدم في العامية المصرية القديمة بمعنى التمزّق، ويقال شرموطة على خرقة القماش القديمة التي تستخدم في التنظيف.

 

20

 

الشابة دي قبل ما أطرشق

عشقتها زي ما يعشق

واحد موظف فبراير

 

21

 

فؤاد حدّاد يكتب عن صلاح چاهين:

 

ولا كل مين

فى الظلمة شقّر

طبل ونقّر

يعرف يسحّر

يا مسلمين

ولا كل مين

عاش في الحديقة

وقال فيه حريقة

على الحقيقة

أصبح أمين

ولا كل مين

حَطّ اللاوندي

ع القلقشندي

ينفع أفندي

في الفلاحين

ولا كل مين

كسّر سنونه

وعمل لي نونو

يصدق جنونه

ويرجع جنين

ولا كل مين

له كلمة صابحة

في ربع صفحة

وآراؤه صالحة

صلاح جاهين

 

22

 

على عكازين

على عكازين

الدنيا ماشية على عكازين

عكاز تسول

عكاز تحول

حالة تجول

على عكازين

وناس بتحيي ومالهاش نية

وناس بتقتل بإنسانية

وناس فقيرة

وناس غنية

وناس بتكسب من غير إيدين

على عكازين

 

23

 

يا العروسة اللي بتغسل

خلجاتها في خليجي

من شفايفك تمر معسّل

دوقي قلبي خس مليجي

 

آه يا هز النخل جيب لي

طرح بحري وطرح قبلي

والفقيرة تحتكم لي

في المراية اللي تزغلل

يا العروسة

 

اللي بايتة ع الحصيرة

لف خلخالها الجزيرة

علقتني من الضفيرة

الغزالة أم الغزيل

يا العروسة

 

شفت عودها لما جاني

عودها لما طل تاني

كنت ماشي وراح تناني

قال ماكانش الخالي شغل

يا العروسة

 

الحكاية لسه فيها

يا محاسن يا فكيهة

كل ضحكه بتضحكيها

قلبي من جوه يهـلل

يا العروسة

 

شفت كوعك لما شمّر

قلت فل وقلت مرمر

العجين التاني خمّر

والدراع لسه مخدّل

يا العروسة

 

آه وياما وآه وياما

قلبي بيقوم القيامة

لما تمشي بالسلامة

ولما كل الشمس تنزل

يا العروسة

 

24

 

تحت السما الواحدة الأغاني الواحدة

واخد عليها والا هي اللي واخدة

علي ومصاحباني من ألف عام

موالها قال السقف من ريش نعام

ضحكتها صاحية ردت المصروع

قُلّتها للعطشان وأما الجوع

شباكها جلاب الهوى والطعام

والليل حنين ع اللي قال يا ليل

سبّحت زي الطير

الله هداني الوليف

قلب المدينة ريف

يزرع غيطان الخير

 

يا ذاكرة الشعب المصري

أنا دايماً مخلص وجميل

أنا واضح زيّ الأحلام

مش شرط يقيموا التماثيل

أنا طينك يا مصر ومائك

وباكلّم نفسي بأسمائك

 

25

 

لمّا يبقى القلب صادق وابن ثورة

وجراح القلب زي الشمس حمرا ..

كل نور الدنيا يتجمع في نظرة

راح تعيشوا وراح تغنوا يا عيالي

راح تلاقوا خير ميقدرهوش خيالي

والليالي والليالي والليالي والليالي

والليالي الخضرا من بين الليالي

 

26

 

أول كلامي سلام

وتزققيني الكلام

أيام في حضنك أنام

القلب الأبيض هنا

يا مصر.. يا أمنا

 

وأطلع في نور الأدان

إذا دعا الوالدان

المدرسة.. والميدان

الإنسانية هنا

يا مصر.. يا أمنا

 

27

 

مـــا أشجعي وأخوفي

أنا خلّ ظــلّ وفي

في الخير وفي

وف الشرّ برضك وفي

 

28

 

ولا نتخلّق، ولا نتخلّق، ولا نحزن غير لو نتفرّق

اسمك اسمي و انا بتشرّق

بني ادم جرحي و دوايا

 

29

 

ليه ما قبلتش أعبد الأوثانْ

ليه ما اكتفتش بأضعف الإيمانْ

ما رضيتش أعيش من غير عيونْ وودانْ

ما رضيتش اعيش من غير فؤاد ولسانْ

ليه قلت طرد الطاغي في الإمكانْ

ليه قلت هان الطاغي قبل ما هانْ

 

30

 

يا حتة من روحي اللي بتردها

يا حتة من قلبي بتتقطع

يا حتة من خدي في شفايفها

من شفتي في خدها

يا حتة من ضحكي اللي مش قدها

يا حتة من عقلي اللي مش ليه

مش قادرة تتعود على التمثيل

وتستفيد من دمي لما يسيل

يا حتة من غلبي مع الكذاب

وحتة من غلبي مع الصادق

يا حتة من سلم رقبتي القمر

بيغني زي المونة في القصعة

يا ليل على كتاف الفواعلية

ضي النهار ما لحقش يضرب كلاكس

ضيعني في الحادث ورجعني

يا حتة طعم لساني وعينيه

وقميصي في المرجيحة لما يدوخ

إذا هاجمني الديب هقف ملبوخ

يا حتة من بكره هتنجدني

أنفاس ولاد نايمين بتوجدني

وتولدني

يا حتة من أحضاني زي الأم

يا حتة بتوصلني زي السويس

يا ريس الغليون يا الأجريجي

أنا ريس الغليون والأجريجي

م الصبح واقف في ميدان القلعة

الترميات بتعدي بي البحر

إن نوّرت والا طفت شبابيكي

كل الحيطان بتبوس في قلبي مرابعه

بغيب على مهلي كأني نسيت

وبافتكر طريقتها لما تبوس

تقعد تهنني عشان ما ننامش

كأنها خافت عليّ الكابوس

كأنها أخفت عليّ الكابوس

خليك هنا ومفيش غيلان عميا

ومفيش حرايق في أُوَض تانية

يا جنينة تسكر في زمن محبوس

يا ليل ما جربش السفر بالقطر

بصرخ كأني قطر مش فايت

بصرخ كأن الدنيا مش سامعة

والشمس مش طالعة

والأرض مش زارعة

لا المزروع ولا المقلوع

ولا حد كان شايف من القلعة

الأيام اللي رايحة بتيجي

الأيام اللي جاية تروح

وكأني مش فاقس من البيضة

ولا عمري خالص من تلجيجي

مجنون عطشجي والا تحويلجي

فتح الأشارة الخضرا للممنوع

كل الدموع متاخدة من تهريجي

متاخدة من تهريجي كل الدموع

يا حتة من قلبي بتتقطع

يا حتة من قلبي أنا المقطوع

 

31

 

الشجن كل النبات متربي

وكل حكمة في ذمة المتنبي

هو اللي قال لك تخبي وهو ما خباش

اتلقى كل السهام شاطر ما خيبهاش

كل السهام أفقي ورأسي

مقدمة لموال عكسي

سألت نفسك عن نفسي

المظلومين أكتر من المُتظلمين

والا أقل

 

32

 

الأوله قام يقسم ولا نام على الناي

والتانية افتح يا سمسم تنفتح عيناي

بتحضروا لنا الغدا على الشمس والا الشاي

الأوله يا فلاسفة

بتحبه وتقوله له أسفة

هواك سفيه ولا أسفه منه إلا هواي

الحب مش أنا وأنت والاّ أنت وأنا

كفاية لو غيري غيرك أو سواك سواي

يقول لك اللي سقاهم لما ضهره انحنى

هما اللي كانوا سواهم

وشق واحد تواهم

ما آخرته بالتفاهم أوله باي باي

ما تفهمي يا فهمية

يا مستوية وفجة

الفهلوة المستقيمة

بتغلب المعوجّة من الألف للياي

الأولة قبل ما أكدب

 

التانية راح تستعجب

التالتة تابتة بتقلب ماخابرش إزاي

طليت من العصفورية لحد قايت باي

وأنا بابا غنوج باغني لماما غنوج

يا للي حبيبك ما جاش اعمل كأنه جا

كل الدموع بالبصل والضحك بالنوجة

عين الولد طالعة نازلة وبُقه رايح جاي.

 

33

 

مرة نغازي ومرة نغازل،

وباحبّك يا جميل ويا طيّب،

ذو جيرة وذو فضل قريّب،

وبيحصل يا قمر وتغيّب،

وكأنك بتقول مش حاصل،

مرة نغازي ومرة نغازل،

غنوة لك تشبه غنوة لي،

والقافية جت علي منوالي،

وباحبّ أمّا تسمع موالي،

بيوالي الدنيا وبيواصل،

مرة نغازي ومرة نغازل،

مانخليش ف الدنيا عواذل

 

34

 

ليه كل ما نقول آه

الناس تقول الله

أنا المُغني

ضلوعي زي الشجر

بتفرش الضله

وبتبني سقف البيت

لما الحيطان تعلى

وروح يا ليل بالسلامة

وهات يا ليل ابتسامة

من الجميل الغايب

هو الحبيب في الحبايب

هو اللي يعرف يا ليل

ليه كل ما نقول آه

الناس تقول الله

أعمل ضلوعي شجر

علشان ترد اللي غاب

وترد قلبه شباب

أعملها سقف وباب

واعملها مركب

وأفضل ألف البحار

واغني فجر ومغرب

واغني ليل ونهار

لحد ما تستعجب

ليه كل ما نقول آه

الناس تقول الله

كان فيه شجر موعود

يصبح كمنجة وعود

تسمع في حسه الودود

ضي النسيم ع الغصن بيتمرجح

ويلاغي ظل الشجر

وسقف بيت في القمر

وجيران تطل وتفرح

وباب يفتح

لكل غايب يعود

ليه كل ما نقول آه

الناس تقول الله

.....

35

 

فين الشعر المباشر؟

حاضر يا روحي حاضر

بلسم هانم يا قاعدة

على البيانو حاضر

ما ابقاش الأمين على دار المحفوظات

طالع من البحر اللي فات

نازل من البحر اللي جاي

خيال بيلعب من صاحبه حركة وثبات

لو عبد: كل المصايب

حتلف من تحت راسي

علشان ما تجيبش

-الناس دي عاوزة تعيش -

لو حر مش سايب

ما ابقاش أنا الدايب ابن الداير ابن الدايخ

ابن كليم المشايخ

ابن خلقت ألوفا

ابن الفتات اللي باقي على بواقي المصاطب

إن ما عملت لكيش البحر طحينة

عاوزة اللي فات والا اللي جاي

يا عقد سبحة

يا صباح الحي

يا طبطاب العجين

يا كلك على بعضك بيحلم

بانتصار المستضعفين

الغزل في قلبي عنقود أخف مني واتقل منك سوا

على مزاج شعرك مزاج الهوا

تنطوريه يتنطور

تضفريه يتضفر

 

حبّـا ً

في سواد عيونك بيشبك بنسه ويفرفر

كلامك والا بقك عاجبني

نفَسك والا ريحته

أنا وانت شيخ واحد

ورور وورورة

سموات من غير إيدين

دخلت في إسورة

حابوسك بالعند

وابوسك بالخضوع

تعظيم سلام

يحيا الدلع

في عرض رجليكي ملك مقطوع

عرق في عز الصيف

جسمه في بلطيك

عريان في عز الشتا

يصرخ يغطيك

 

أمة وراور بتغني تقل الجبل

عرض الصفحة

بصوت جزاة الناس

أوتوبيس بيشغي

سرير بعمدان لوحده في الخلا منصوب

طشت الغسيل والولادة

الليل طويل

والفجر زي اسمه فاجر

بيليّل ويغني حاضر

براح الدنيا قفص مسرحي

علشان خاطر

 

36

 

يا سامعين: أبناء بلد واحدة

تحت السما الواحدة وياما جرى

مرت سنين ع الدنيا متقدرة

الغرب سماها العصور الوسيطة

ونظر وقال كان الزمن مظلم

أما الحقيقة البسيطة

بتقول في دار الشرق

مهما جرى ومهما يجرا

من أول تاريخ الهجرة

كان عندي فجر أنشق

نوره في عين الجبارين مؤلم

حتى اذا ما ألتقوا بالفارس المسلم

عرفوا الحقيقة وعظموا فارس

صلب القوام والدرع تحت العمامة

حتى اذا ما نزل من السرج ونصب خيمة

سهل الدموع إلا ابتسام الراضي

مايل بجسمه لاستماع الأراضي

وعلى العيدان الطرية

ايديه ندية كيف أيدين الفارس الغارس

هذا الذى رد الثغور البهية

وبنى باسماء الأئمة المدارس

وحضر مع الخصم لمقام القاضي

وأعاد إلى الأم الصليبية ابنها

أما عن المنكر نهى

وأما في ليلة شجن بالشام

حلف يمين أفضل له

يفقد ولاده ومؤنسته ولا يهدم

هذا صلاح الدين فتى مقدم

 

حامل لواء الفتية والأجناد

فوق الخيول المسرجات الجياد

وهي ليلة من ليالي ربيع

أو هي ليلة من ليالي جماد

القاهرة أولى رايات الجميع

عند المقطم كبرت للجهاد

يا رب تشفي الصدور

يا رب توفي الأمهات الندور

يا رب تمنع عن ولادنا الويل

زاحفين على السواحل سلاسل نور

والبحر من دمياط يحيي السيل

واترتبت ع الخطوة رجلين الشهور

والصبر أملك من عنان الخيل

حتما على قدام وحتما ندور

والحصن في عكا عظيم الليل

يلقى الآذان بيشق فوق السور

الحق يا ولاد العرب منصور

في كل أرض اتكلمت عربي.

 

الأرض بتتكلم عربي وقول الله

إن الفجر لمن صلاه

ما تطولش معاك الآه

الأرض بتتكلم عربى

 

الأرض بتتكلم عربي ومن حطين

بترد على قدس فلسطين

أصلك ميه وأصلك طين

الأرض بتتكلم عربي

 

الأرض بتتكلم عربي سبل وكروم

تجرى اللقمة على المحروم

ما تثبتش حصون الروم

الأرض بتتكلم عربي

 

الأرض بتتكلم عربي يا خيال

بيعد سيفك أم عيال

ظهرك ياما من الأجيال

الأرض بتتكلم عربي

 

الأرض بتتكلم عربي حتى البور

بنت الساقية والطنبور

حتى في بطون الأرض قبور

 

الأرض بتتكلم عربي بوجد وشوق

الفرع اللي يهم لفوق

لأجل الجدر يشم الضوء

 

الأرض بتتكلم عربي جدورها جدود

مد اتوسع زي العود

أنت الباكر والمولود

 

الأرض بتتكلم عربي.

 

37

 

أهدي قصايدي جهاد وجهاد أقدمها

لكل مين عاش قصايدي قبل ما أنظمها

قصايدي فورة غضب ما قدرت أكتمها

غنّاها قلبي وجرح القلب قسّمها

في مصر سوق الذمم العمر موسمها

في مصر رب الشرف والنخوة مجرمها

أفواهنا لو نطقت بالحق كممها

أنوفنا ريحة النتن والكبت شممها

عيوننا سهد استلمها وجهد سلمها

رجلينا تحمل جسومنا والا توهمها

 

إيدينا لنتاج إيدينا، منع تقدمها

إن أوشكت بالكلبش الأعمى يصدمها

أرواحنا مالهاش تمن في الوحل يختمها

أجسامنا قربان لرب الحرب يولمها

شدت شعورها الصبايا البؤس يتمها

عرى حيطان السجون جبار وعتمها

بردت نجوم السما متلفّعة بغيمها

رأيت بلادي يصبوا الشر في جحيمها

حفرة مساخر جبال آسيا ما تردمها

 

نزعت من صدري ريشة ورحت أرسمها

قصايدي صرخة معذب طال عذابه ما طال

إلا شتات من نوازع قلبه ترجمها

يا معذب الجماهير يا ظالم اظلمها

ومن حياة الكفاف الضيقة احرمها

جموع تجدد شبابك وأنت تعدمها

يا معذب الجماهير يا باغي كوّمها

في السجن بالجملة عمال فلاحين طلبة

مجاهدين مجهدين على البُرش نيمها

وسطوتك شهوتك في الخلق حكمها

راكن على جيوش غريبة بكرة نهزمها

اللي ما حيلتوش مداس حيدوس على رقبتك

واللي بنى صروحك هو اللي يهدمها

قصايدي بنت الجهاد هتّافه هتّافه

اليأس موت بالأمل دايما أتممها

 

38

 

في كل حي ولد عترة وصبية حنان

وكلنا جيرة وعشرة وأهل وخلان

 

أميرة عاقلة في الحجلة والعقل يطير

كانت صغيرة بضفيرة، وكان هو صغير

ساعة ما تضحك مع اخوها.. تلاقيه بيغير

ولما ترفع قلتهم تلاقيه عطشان

زمانه ماشي بخطوة يضم

زمانها كبرت وبقت أم

زمان جواب جايلها بيجري على العنوان

 

الفجر بيلاقي المغرب وبييجي ويروح

والليل يطل على الشارع شباك مفتوح

هنا الرصيف وهنا السلم وهناك يا سطوح

متعلقة كمام النونو في ديل الفستان

زمان ضناهم في المدرسة كنز الأوطان

 

نحضن ولادنا ولا نخلي حنية وذوق

نكبر معاهم ونغني لقدام ولفوق

يا دي العيون اللي بتقرا في كتاب الشوق

الدنيا خضرة ومش فاضل علي بكرة زمان

أصل الحكاية حكايتنا نبني الانسان