بداية الأسبوع كانت بطيئة. عم نعدّ مع وزارة الصحة عدد المصابين بالكورونا يلّي لحدّ هلّق صاروا 16. وِلْعِتْ بس تسجّلت أوّل إصابة «بالشرقيّة» وتحديدًا كسروان (أُو مون دْيو) حسب الـmtv و«خارج البيئة الشيعيّة» حسب مراسلها. صاب الهلع القناة لأن كانت مفكرة إنه المسيحيين ما بينصابوا، متلها متل الـotv ممثّلةً بكبير إعلاميّيها عبدو الحلو يلّي أخد ع خاطره من حكيم بمستشفى بيروت الحكومي رفض يفوّت تراب مار شربل عالمستشفى. تدخّل الأب مجدي علاوي وقرّر يطوف فوق لبنان ليرشّ مي مصلّاية لمنع انتشار الفيروس. بهيدا الوقت، المطارنة كانوا عم يمنعوا السلام بالإيد بقلب الكنايس وعم يفرضوا المناولة بالإيد. شكلن ما تواصلوا مع عبدو والأب علاوي.
هيدا ع صعيد الهلع الصحي. أما عَ صعيد الهلع السياسي، بشّرنا رئيس الحكومة بإنو الدولة مَنها (مش) قادرة تحمينا وإنّو ناطرتنا إجراءات موجعة ابتداءً من التلاتا. بس ما حدّدلنا إذا هيدا الوجع رح يكون بيشبه وجع القلب أو وجع المفاصل. أصلاً شو همّنا طالما وزير الاقتصاد خبّرنا إنه صار فينا نبعت واتساب لحماية المستهلك تنتشكّى ع التلاعب بالأسعار، ومجلس الوزرا وافق ع إصدار طوابع تذكاريّة لمناسبة إنشاء جامعة الدول العربية. وبكرا منعرف شو رح يكون مصير دفع اليوروبوندز. لِكْ حتى بالويك أند ما بدّن يخلّونا نرتاح.
جورج غانم: دولة مفلسة بيحقّلها تسأل عن كيفية تصرّف المصارف بأموالها؟
عبدو الحلو: مع مار شربل مش هيك بيتصرّفوا.
لانا مدوّر: عنا أشغال يا زعران! اولاد مسكرين الطريق على المدينة الرياضية!
أقوال مأثورة من الإعلام.
ولأن اليوروبوندز عاملين هلع للجميع، إنلكودينغ الرفيق نبيه برّي، قرّر المدّعي العام المالي يحجز ع أصول 20 مصرف. القرار ضاين كم ساعة بعد ما هدّدت المصارف بالتسكير، واستنفر رئيس الظلّ لجمعية المصارف ومصرف لبنان جورج غانم ومعه الحريص الأوّل ع أموال "بنك ميد" سعد الحريري. «جمّد» مدّعي عام التمييز القرار لأن رح «يخلق فوضى مالية وإقتصادية». ع أساس هلق كلّ شي منظّم وسعر الصرف ما وصل للـ2700 تقريبًا والناس ما عم تكسّر المصارف والاحتجاجات ما رجعت بكلّ المناطق، حتى الضاحية. طبعًا جماعة الحزب جرّبوا يضبضبوا الموضوع عالسريع متل ما جرّبوا يسَكْتوا علي جمّول لأن كتب ستاتوس ما عجبن فضربوا خيّه.
ما فيك تعمل مصاري إذا إنت آدمي. بدك تكون فاسد وبندوق.
السياسة منّا وفينا. مضطرين نحكي سياسة لو ما منفهم سياسة.
يلي بيقدر يهرب من اليابان بهالطريقة، أكيد بيقدر يحكم لبنان. بدنا مخ متل كارلوس غصن.
أقوال مأثورة لميريام كلينك.
الاستدعاءات بعدها مستمرّة وآخرها ليوسف عاصي لأن كشف عن شحنة رز مسرطن. تحقّق معه، أمّا يلي عمل الجرم فقاعد مرتاح ببيته. بس أصلاً هيدي صارت من تقاليدنا. ليكو يلّي اعتدوا ع محمد زبيب، طلعوا بعد 5 إيام وما حدا قرّب صوب مروان خير الدين. بالمناسبة، السلطة (يلّي خايفة ع حقوقنا وبدها تسترجعهن) بعدها محتجزة فاضل الدرج ونور شاهين ومحمد كنعان وجورج قزي ومحمد سرور.
وقبل ما يخلصوا الـ500 كلمة، الأحد مسيرة يوم النساء العالمي. كلّنا مدعوات/ين نشارك، حتى نجوى كرم.
– لو أهلك عارفينك بتحبّ النتف كانوا فتحولك مسلخ دجاج. إنه ناقصك مصاري؟!
– الموضوع حياتي مش موضوع مصاري. الموضوع لذّة الربح والخسارة. لذّة التحدّي. عم بستثمر ذكايي بالورق تشلّح العالم مصرياتن. لين ما بقدر إشرحلِكْ ليش بحبّك إنت والبوكر. تنيناتكن بدمّي.
(عن ارتباط الحب والبوكر بنتف الدجاج، من مسلسل لبناني رصين).
إضافة تعليق جديد
تهمّنا آراؤكم ونريدها أن تُغني موقعنا، لكن نطلب من القراء أن لا يتضمن التعليق قدحاً أو ذمّاً أو تشهيراً أو تجريحاً أو شتائم، وأن لا يحتوي على أية إشارات عنصرية أو طائفية أو مذهبية.