قصائد مباشرة
١
نعلّم الحجر
يصبح سهام للصياد، رماح للحرب
يصبح شون للحب
بيوت، سقوف، حيطان
للنقش، والصور
تماثيل، جسور، ورش
فصول، هَرم، عُمدان
وبوابات حصون
تفتح على الدفا
فى البرد، أو فى الحر
نعلم الحجر
يتعلم الحجر
يرفض
يكون سجون
٢
نعلّم الأراضى البور، تصير غِيطان
نعلم الغيطان
تطرح غلال لوز وبرتقال
تطرح ورود عسل
شجر ورق
تطرح كافور، وتوت، وسيسبان
نعلم الغيطان
تتعلم الغيطان
تقف حرس وديدبان
تحمي مداخل كنزها المختوم
من أى كف،
ما إتغسلشى بالعَرَق
٣
نعلّم المطر
تتلم قطراتُه الضعيفة جنب بعض
تِفتّت الحجر
تعلي راية الخضار
تفجّر الانهار
يبقى لها بيت وأرض
تسقي الأراضي، والعطاشى،
لو يمدّوا كفّهم
تحمل مراكب الصيد وأشواق السفر
نعلّم المطر
يتعلم المطر
يعرف من الانسان
ويعرف الانسان
معنى اتحاد الضعف، فى ساعة الخطر
وازاي بملايين النقط
يتفجر الطوفان
٤
نعلم الصبيان تِحِبّ
نعلم البنات، تخرُج من الخفا
ترفع غرامها ع البيوت
رايات مهفهفه
نعلم الشبان
فى عز عز البرد
يخلقوا الدفا
٥
نعلّم الحجر
نعلم الشجر
نعلم
نعلم المطر
نعلم الحياة
نعلم البشر
نعلم الحياة
تتعلم الحياة
تعرف: تكون لنا
سجن طرّه - يناير ١٩٧٥
والحرب لسّة في أول السكة
الفلاحين بيغيّروا الكتّان بالكاكى
ويغيروا الكاكى بتوب الدم
وبيزرعوكْ يا قطن ويّا السناكى
وبيزرعوك يا قمح ساريه علم.
وبيدخلوكى يا حرب، فحم الحريقه
وبيزرعوكى يا مصر، شمس الحقيقه
وانتي ميدان الحرب
سينا البداية
وانتي جنينه الصلب
والنصر رايه
وانتي البُكا والغُلب
انتي الرحايه
وانتي البارود، والحُب
والحرب جايه
غنّوا التلامذه ، الصبح
للحريه
الفلاحين ضمّوا غِيطان القمح
رفعوا الرايات، فى الفجر، متندّيه
رفعوا السنابل، بنادق
عبوا البنادق، بارود
الرملة قادت حرايق
والنار، فى دم الجنود
والحرب زى جناين الحريه
مهره، ومالهاش حدود
والحرب،
لسه، فى أول السكه،
اتفجرّ يا مصر
اتفجرّ بالحرب، ينطلق النهار
اتفجرّ بالحرب،
ضد الجوع
وضد القهر
ضد التيار
واتسلحّ للحرب، بالحرية
وإتفتحى ورده بدم ونار
وإتجمعى من ألف صرخه وضحكه
والحرب
لسّه
فى أول السِكّه
٨/١٠/١٩٧٣
يتجمعوا العشّاق
يتجمعوا العشّاق ِف سجن القلعة
يتجمعوا العشاق ف «باب الخَلق»
والشمس غِنوة من الزنازِن طالعة
ومصر غنوة مفرّعة م الحَلق
يتجمعوا العشاق ف الزنزانة
مهما يطول السجن مهما القهر
مهما يزيد الفُجر بالسجّانة
مين اللي يقدر ساعة يحبس مصر
يتجمعوا والعشق نار ف الدم
نار تحرق الجوع والدموع والهم
نار تشتعل لما القدم ينضم
لما الأيادي تفور تلمِ اللحم
و اللحم متنتر ف رملة سينا
و الكدب بيحجز على أيادينا
قدم العدو غارسة ف لحم ترابي
و الكِدب عشِّش مُخبرين على بابي
والمخبرين خارجين كلاب سعرانة
بيجمعوا العشاق ف الزنزانة
مهما يطول السجن مهما القهر
مهما يزيد الفجر بالسجانة
مين اللي يقدر ساعة يحبس مصر
مصر النهار يِطلقنا ف الميادين
مصر البكا مصر الغُنا والطِين
مصر الشموس الهالة م الزنازين
هالة وطارحة بدمنا بساتين
مصر الجناين طارحة مين يقطفها
مصر الجناين للي يرفع سِيفها
مهما يطول السجن مهما القهر
مهما يزيد الفُجر بالسجانة
مين اللي يقدر ساعة يحبس مصر
أغنية حب
١٩٧٢
نعشق وتحضن عنينا
نفتح عيونا ونحلم
يصبح نهارنا جنينه
والفجر يطلع يسلم
يحضن معانا الرفاقه
والقلب، اه، لما يعشق
يفتح ولا الف طاقه
فيها العصافير، تزقزق
نعشق وتحضن ايدينا
كل الحياه، لما نعشق،
الرمل يصبح مدينه
والفجر يطلع يشقشق
يا شمس بكره، تعالي
خاتم في صابع، حبيبي
يا بدر ، نص الليالي
نور، في ضحكة حبيبي،
يا برتقان يا بو دمه
شفتك فى شفة حبيبى
نحلم ببكره يجينا
راكب سفاين، سفاين
وانتي فنار كل مينا
يا جنينة غير الجناين
والحب في القلب ورده
ورده بالوان جديدة
نرفعها بعد ، المناهده
رايات في ناصيه، بعيده
١٩٧٤
لحّنها الشيخ إمام
يرجع البلشون يطير
إلى زكي مراد
١
يرجع البلشون يطير
يبتدى م النوبه، يغلط فى الجهات
يعرف الغلّه ولون الريش وسحر الطيران
يعرف الفيضان
و فوران النبات
يكشف السرّ المغطى
يعرف الفقرا وحُراس السجون
يشرب الشاى فى الواحات
والحجلات.
فى القدم
و المرايات: العيون
والأيادى والقلم
ضد جيش القهر حربه
للغلابا: ميت علم
تنفرط م العقد حبه
يرجع البلشون يسافر
يخلط النيل بالقناطر
ينكسر تحته الجناح
يتنتف ريشه، يلم الريش جراح
ّمُر طعم الدم
قاسيه البوابات
يرجع البلشون يطير
يبتدى م النوبه
ولكل الجهات
٢
أنا جَمَل الصلب لكن علتى الجمال
و يا عم يا جمّاله يا ليله
سكة بعيده، الرفاق عطشانه يا ليله
قادرين، و نقدر لسه ع الاحمال
يا ليله
٣
نختلف، نتفق
الرايات تتسرق
نختلف، نتفق
الفروق تتكشف
نختلف، نتفق
الورد تتخلق
نختلف، نتفق
البلاد تتعرف
ايد بحلم النهار
ترسم الانتصار
نختلف، نتفق
نتفق نختلف
ننطلق م الحصار.
٤
يضحك للبحر
يضحك والكرباج ع الضهر
يهتف وسط جنازته
يهتف وسط جنازته
لمصر
ديسمبر١٩٧٩
من اغاني حصار بيروت
صوت المسا
صوت المسا داخل
خطوة ورا التانيه
وعيون بتتقابل
في حلم حريه
صوت المسا ، يجينا
ورفاقه ، في الخندق
بيلونوا المينا
والبحر ، بالازرق
يا بيوت بيفتح ع العروق والنبض
للارض طعم الناس
للعشق طعم الارض
بيروت شجر عالي
بيميل ويحضن بعض
وبيرسم المينا
مركب وطير ابيض
نُص الشوارع ورد
نص الشوارع نار
وعيون في عمر المهد
بتفّّرق الامطار
يا بيوت بتفتح ع العروق والناس
يا حمامه ناسيه عشها ، في متراس
يا حرب يا جايه، يا مجمّعه الحراس
يا حلم حريه
ماشي ورافع الراس
اغسطس ١٩٨٢
آغنية ما لحّنهاش عدلي فخري
شجرة الموت
شجرة الموت
قطعت حبل الخلاص
ودخلت م السرًه
حضنت امي اللي نعست
قبل ما تسمًي
رضعت من دمها
واخضرًت البذره
وفي السرير اتبدّل جسمي
وصار شجره
مع كل صاحب يزورك
جسمي بيورًق
جسمي النحيل ،الزرق
الزرق الناعم.
خمسين سنه، والشجر
بيسقًط اوراقه
وانت،
ربيع دايم
١٩٩٢
قهوة الصُبحية
مع قهوة الصبحية
يملا نسيم الن، كل البيت
مع كل نسمة، ينفتح بابي
،يدخل صحابي
حتى اللى ماتوا
يدخلوا جماعات
مع كل شفطه يتملي البيت بالكلام
هنا كلام ما وصلشى لسه لشط
هنا سُكات
هنا اللي قهوة عينهم تطلق الضحكات
هنا مدن زرنا قهاويها
وشربنا م الأحلام
هنا صحاب نغلّط فى اساميها
هنا قهوه مُره وحبهان م الدهب
هنا قهوه سوده، والحليب على كنب
هنا سجون تتعدّ فى التمامات
يملاها حلم بقهوه
دايره فى الصباح
وتنشرب فى البراح
وأنا فى مكاني
مع قهوة الصبحية
بالقى الكون
فى فنجاني
٦ يونيو ١٩٩٨
شمس الصُبحية
السكن في تَنْي العين
يدخل شعاع الشمس
من شعر مفرود ع المخده، اللى جنبى
من الَنَفس، واللمْس
من الستارة اللى بتغطى شباكى، وقلبى
يدخل شعاع الشمس
من العَتم والخفا
يطلق صَوابع الدفا
عصافير تلقط غلّة الأيام، من قورتي
حَبّه، بحَبه تتمسح صورتي
ترجع ملامحي مع شعاع الشمس
٥ يونيو ١٩٩٨
ساعات
باشوف القصايد، بتمشي
وبافتح عيوني لاخرها،
وأخلي القصايد تنام
على مخدّه من ريش نعام
في مهد الدموع اللي نابت
في جفني
ولما القصايد تفكر تسيبني
اغطي القصيده
برمشي
٢٠٠٠
السكن تحت الجلد
الى نصرحامد ابو زيد
١
تتعب من السفر القريب،
والبعيد
تغيّر القمصان
مع العنوان
تترك حيطان الزمن
تنفض عبايه البدن
تلمح عِنيك، فتحة في جلد الايد
تضحك لها
وتمر
شايله يمينك، كتابك
شايله الشمال،
ابتهال
واللي اتسرق م العمر
٢
نَفَسك دفا في رقبتي
وعيون تسابق كتابتي
وتحط فاصلة نسيتها،
ونقطه آخر السطر
٣
ينده عليك الصحاب
ترجع، في صفحه كتاب
تنده عليك ابتهال
ترجع، في رد السؤال
ينده عليك الوطن
تركب حصان الزمن
وتعود،
علامة نصر
مارس ٢٠١١
كتابة على كفن سالى زهران
اهداء إلى ايهاب السويسى
يا سالى يا بنتنا
هتموتى كام مرّه ؟
دمك على كفنا
وانتى بلاد حرّه
مين ينكرك كافر
وانتى جسد طاهر
يفتح بيبان بُكرة
٢٤ ديسمبر ٢٠١٢
ايه اللى بين الرصاصه والقتيل
برتقان ينسى يزهر ع الشجر
ويفوح بنات
أرض تكشف صدرها للشمس
يكسيها النبات
نيل يّغير تيابه
ويفتح كتابه
ويبدأ الفيضان
بقطرة الندى
بمُهر جامح فى المدى
بيكوّر الرمان
و يجمع الشهدا
فى سكة الابتدا
والشعب وحده اللي حي
من الهرم للشام
نزل العَرَق ع الدم
كتبوا بسِن القلم
على حيطان البيوت
الشعب مسك الزمام
الشعب يرفض يموت
الشعب رفع العلم
إرحل يا جيش الظلام
خلّي القمر يبتسم
خلّي شموسنا تفوت
من كل حرف ونغم
يعلا، يهدّ السكوت
يكسر قيود القدم
ارحل يا جيش الظلام
دي الخطوه ثوره وضَيّ
خلّي ولادنا الصغار
تفتح جنينة النهار
تكتب تاريخنا اللي جاي
كل المظالم تموت
والشعب ، وحده ، اللي حي
١١ اوغسطس ٢٠١١
الفراشة
الى مينا دنيال
أقطف يا مينا،
وردة الجنّه
واحضن جَسد حمزة ،
الصبي المقتول
ولِفّ زينب بنت «قانا» باَلعلم
واسأل الدُرّة ، الفلسطيني ،
محمد
كان شكله ايه القاتل؟
ويفرق ايه عن اللي قتلك يا مينا؟
١٠ اكتوبر ٢٠١١
حلمي سالم يرحل في الاماكن
لما الشاعر يقفل كتب الايام
نفتح كتبه
نتهجي وياه الدنيا والاحلام
ندخل جوّه حروفه
ونشوفه
إزّاي بيزلزل أركان الكون
علشان يكشف
جوّه عيونا أسرار اللون
حلمي سالم قفّل كتب الايام
٢٩ يوليو ٢٠١٢
الرصاص يكتب أسامينا
اغنية للشهدا اللي ما بيعرفوش لسه يكتبوا أساميهم
قبل النهار ما يضمّنا في الصف
قبل القلم ما ينام
حمام
في الكف
قبل السما ما تنام على الورقة
بقع بيضا، وبقع زرقه
قبل النعاس في حضن أهالينا
بعتوا الرصاص يكتب أسامينا
٣١ مايو ٢٠١٢
مريم
الفضل يرجع لاصحابه للشهدا للي بيفتحوا بوابات شمس الحرية للمصابين والجرحي.
يا وفاء من فضلك ضفري شعر مريم وخليها تروح المدرسة.
١
مين هيفِكّ ضفاير مريم؟
مين هيشيل من وسط ضفايرها
الطين والدم المتجمّد ورصاصه،
دخلت في الشعر وباتت
و يبديلها بنجمه؟
مين هيفك ضفاير مريم ؟
مريم بنت امبابا
ما عرفتيش مرتينا فكري
اللي سبقتها ع الجنه
كانت زيها في كنيسه
فى كنيسه القديسيين : سمعتي الاسم يا مريم
هي في حته بعيده، قرب البحر
هى عروسه
تعرف في الزينة و في الشعر
خلّي مرتينا تفك ضفايرك
لو تهتي، او ماعجبكيش تضفيرها
اسالي عن مريم تانيه
مريم مكرم
من الزاوية الحمرة
خرجت فرحانه
وهي بتسمع صوت اثورة
خرجت من البلكونه تصوّر
صوت الشبان اللي بتهتف للحريه
لكن الطلقة
يعني : الرصاصة يا مريم ، وصلتها
قبل الصورة ما تظهر في التلفون
تلاقيها فى الجنه، معاكى يا مريم
اسالي عنها
لو ماعجبكيش تضفيرها لشعرك. روحي لوفاء
ايوه يا مريم
اسمها وفاء هيكل
افتكري كويس
وفاء هيكل يا مريم
وفاء يا مريم فضلت ويانا وماشيه وسطينا
شهيده
مش عارفة امتى هتطلع لكوا ع الجنه
لانها فى محمد محمود يا مريم
وده شارع
مش بعيد عن ميدان التحرير يا مريم
الغاز دخل من تحت اقدامها
وفضل يمشي فى الاعصاب
فضل الغاز يطرد في الدم،
نقطه بنقطه
كل الدم اتسرسب
يا مريم/ ويا العمر
سكن الغاز في عروقها بدل الدم
لكن لسه ايديها قوية هتقدر،
تعمل من شعرك: احلي ضفيرة
٢
مين هيعلم مريم تكتب اساميها و اسامينا
مين هيعلم مريم تقرا؟
طبعا انتي عرفتي يا مريم
ان الشهدا مابتكبرش
اسألي يا مريم عن مدرسة اسمها
بحر البقر، كل الاطفال فيها شهدا
خُشي سنه تانية رابع
إلعَبي وياهم واكتبي
إقري وّعِدي
إفضلي وياهم في الفصل
لكن لو نسيوا او كانوا بيكتبوا دلوقتى
بلغات تانية فى الجنّه
تعملي ايه يا مريم ؟
تسألى مينا دنيال
عن واحد صاحبه
راجل حافظ كل الاسماء
ياخدك من ايدك يا مريم
هيقرا معاكي ويكتب
هيقول ويفسر
سرالحياة و الموت
و يقولك يا مريم :انتى ليه اتقتلتي
و انتي بتغني جوه فرح
الراجل دا يا مريم
اسمه عمّو عماد
لكن هتلاقي الشهدا بيقولوا
ان اسمه الشيخ عماد عفت
٢٠١٤
إضافة تعليق جديد
تهمّنا آراؤكم ونريدها أن تُغني موقعنا، لكن نطلب من القراء أن لا يتضمن التعليق قدحاً أو ذمّاً أو تشهيراً أو تجريحاً أو شتائم، وأن لا يحتوي على أية إشارات عنصرية أو طائفية أو مذهبية.