من يوميات ثورة الحرية والتغيير

٢٨ كانون الأول/ ديسمبر ٢٠١٨

مشينا لصلاة الجنازة على الشهيد عبد الرحمن الصادق... الناس كانوا بيجهزوا لصلاة الجنازة الكان مفروض تكون بعد صلاة الجمعة في مسجد الحلة.

السلطات لما عرفت انه الناس اتجمعوا في المسجد جابوا الجثمان مغسل ومكفن وودوه المقابر طوالي وأجبروا الأسرة يصلوا عليه في المقابر بدل المسجد وأجبروهم يدفنوا الساعة ١٢:٣٠ عشان يضمنوا إنه الناس في صلاة الجمعة وما يحصل تجمع.

حوالين المقابر ناس الأمن منتشرين و٥ تاتشرات عليها عساكر مسلحين بيراقبوا الدفن.

حكومة بتخاف من الجنائز دي حكومة سقطت خلاص.

#مدن-السودان-تنتفض

#جمعة-الشهداء

#تسقط-بس

٣٠ كانون الأول / ديسمبر ٢٠١٨

امام قيادات الشرطة اليوم ... البشير يهدد المحتجين بالقتل (القصاص) ويبرر القتل في التظاهرات بالآية (ولكم في القصاص حياة).

٣ كانون الثاني / يناير ٢٠١٩

بورتسودان - موكب ٣ كانون الثاني / يناير. الناشطون السودانيون يتناقلون صور الاحتجاجات واستعدادات لمظاهرات الجمعة على منصات التواصل.

نشرتكم - هتاف بورتوسودان في أقصى شرق السودان: «كل البلد دارفور» يعيد الحياة لشعبنا ويهزم كل دعاوي العنصرية وأوهام التفوق الاثني الي الأبد.

«الطلقة ما بتكتل

بِكتل سُكات الزول»

١٨ كانون الثاني/ يناير

كنائس الخرطوم تدق اجراسها حزنا على الشهداء.

٢٥ كانون الثاني/ يناير

الآااااان

الثوار ينتفضون في شارع المطار جوار منزل الشهيد محجوب... قوات كبيرة من الأمن والرباطة والشرطة وإطلاق كثيف للغاز المسيل للدموع. نداء لناس اركويت والصحافات لفك الحصار من بيت وعزاء الشهيد.

التوجه لدفن الشهيد محجوب، مقابر الصحافة.

٢٠ كانون الثاني/ يناير

عميل أمن في قبضة كنداكات العباسية.

٢٨ كانون الثاني/ يناير

إضرابات عمال ميناء بورتسودان احتجاجا على بيع الميناء، واقفال البوابات بالآليات والحاويات.

٢٢ شباط/ فبراير

البشير يواجه المطالب بالاعتقالات: الأمين العام للحزب الشيوعي و٣ قياديين في حزب الامة من بين المعتقلين.

٥ آذار/ مارس الاضراب العام

بكرة

ما تشتري حاجة من الدكان

ما تمشي السوق تتسوق

ما تشتري اكل من مطعم

ما تركب مواصلات

ما تشتري كهرباء او رصيد

ما تكب بنزين وجاز

ما تعمل إجراءت (بطاقة - جواز - رقم، الخ.)

بكرا ما تطلع #قروش من جيبك نهائي

من الان اشتري الحاجات الضروية حقت بكرا بطريقة عادية بدون تبذير كلها ٢٤ ساعة بس..

نجاح يوم بكرا يعتمد عليك شخصياً.

٨ آذار/ مارس

تجدد المظاهرات بعد دعوة قوى إعلان الحرية والتغيير...

التظاهرات تدعو النظام للتسليم الفوري للسلطة.

٩ آذار/ مارس مدن السودان تنتفض

٦ نيسان/ ابريل

الثورة مستمرة حتى في صمت الناس

...فِي خلال أسابيع اغلب بيوت البلد شرق وغرب وجنوب وشمال واغلب طبقات المجتمع بقت عارفة وسامعة بل مشاركة في الحراك الحاصل.

لكن مؤخراً جات صنة كده وتّرتنا ليك كلنا / أغلبنا، الناس ابتدت تتداول مفردة «احباط» (والتوتر ده ما افتكر انه كعب بل إن دل على شي فهو الحرص الشديد). المذهل بالنسبة لي انه في الايام الشبه هادئة (مقارن؛) بالأسابيع الاولى، طلع الهدؤ ده ما ساكت ولا هو ملل او فقدان أمل ولا رمي لطوبة الثورة

اتاري الناس لابدين بفهم (وبعض الساكتين، ساكتين فوق رأي).

انتبهت انه داخل دوائر مختلفة تماماً من بعض بدأوا ناس كتار فيها يبادروا وياخدوا خطوات اكثر نضج وفيها وعي شديد وادراك لأنه دورنا كشعب حدوده ما النزول للشارع بس.

الناس كلها بَقَت في تنظيم سياسي اسمه «الشعب»!!

الناس كلها بقت «المهنيين» [تجمع المهنيين السودانيين] (فلا داعي للبحث عنهم)

برغم ترتيب الامور بشكل يحيّر وتسلسل الاحداث بشكل غير المتعارف عليه وعلى غير المعتاد، لكن البيحصل ده مذهل وسرعة الوعي والنضج والصحوة الحاصلة دي عجيبة فعلا (ما شاء الله عيني باردة)

... تخيلوا الخبرة الاتكونت في الأسابيع الفاتت في الشارع لما يكون معاها تنظيم وترتيب وناس متحدة وجاهزة لمواجهة كل الحِيَل.

تخيلو النتيجة حتكون كيف!

الثورة مستمرة حتى في صمت الناس.

الخاص والعام

عايزة اقول كلام كتييييير ممكن تقروه على كم يوم كده اذا حبيتو تقروه واصلا انا حاساه مشربك جوّة راسي لكن حاحاول أقول.

كلنا عندنا حكاوي تكفي مجلدات.

وكلنا حكينا لبعض عنها وما زلنا نحكيها بل حكاوينا احياناً تزيدنا حماس وبتحمس البِنِحكي ليه، لكن ده نتاج فرعي Bi product للثورة إنما الحكاوي دي ما هي الثورة زاتها...

الثورة هي رحم لحالة النشوة دي. لكن عمرها ما حتكون وليدتها!

كمان في صديق مرة قال انه رأيه انه من اكتر الحاجات الاثرت وأضرت بمسار الثورة المصرية هي الحالة الرومانسية الكانت صائبة الأغلبية. وانه الناس الكانت بتقول الكلام الواقعي البايخ ده كان دايما بيهاجموهم ويرفضو كلامهم...

حقو الناس دي تتذكر انه على قدر ما الثورة والتظاهر هو فعل شخصي على قدر ما انه تعاملنا مع الامر لازم يكون بيختلف تماما عن تعاملنا مع امورنا الشخصية لانه الوسائل البنتعامل بيها مع امورنا الشخصية سوا كانت وسائل صحيحة او خاطئة فصداها كلن خير وِلّا شر بيعود علينا احنا برانا. أما تعامُلنا مع امر بلد كامل بيعود ولو حتى بقدر بسيط على الكل، لانه الامر امر عام.

باختصار نكران الواقع والرومانسية «والاڤورة» [المبالغة] في شوف الامور شكل من اشكال تضليل الآخرين وان كان بشكل غير مقصود وغير مباشر.

وكذلك النظرة السوداوية والمبالغة في التوقعات السيئة برضو نوع من التضليل وكسير المقاديف

وما نستهوون أبداً أبداً بأثر الاراء والكلام البنقولوه ولا البنسمعه ...

المهم نتذكر كان متشأمين وِلا متفألين انه ما في أي مجال للتراجع لانه التراجع بعد المرحلة دي عواقبه «الفأل تحت اللسان» زي ما يقولو. المهم بالكف، بالبنية، بالمنطق او بدونه، لازم نكمل...

ما ألمهم في التظاهرة؟

لو اتفقنا انه الهدف من التظاهر هو توصيل صوت الرفض يبقى مهم كان الموكب غزير ومهم كاوينا الكجر ومغصناهم بالمناوشات والمناورات، الخ. ففي الاخر ما ننسى انه احنا ما مارقين عشان نكاويهم، وانه الموكب الناجح هو الموكب البيقدر يستمر لمدة كافية من الوقت ويغزر وتزداد اعداد الناس اثناء سيره من نقطة الي نقطة. وان الكر والفرّعلى قدر ما فيه مشاهد ظريفة تخلّي القلب يسيح زي انه خالتي فلانة فتحت بيتا وسيّد الدكان الفي السوق دسانا والشاب الوراي جراني من البمبان والبتّ السايقة ترست لينا بعربيتها وعطلت الكجر من انهم يوصلونا الخ.

ده ما الموضوع فما ممكن القصص دي تسرقنا.

ومع الوكت الموضوع يتحول لكيف ومزاج وتكييف يصرفنا.

اليلة السوق العربي عدد الناس كان كبير لكن الموكب ما تجاوز عدد الدقائق الا تعرضت في الفيديوهات اللايف والباقي كله كان كر وفر ومناوشة ومناورة ما بين المتظاهرين وناس الأمن.

وده بيرجعني ليوم ٢٥ كانون الأول / ديسمبر لما مشينا والامر كان مشابه، رجعت وانا بستحضر في ذاكرتي انه في مرة اتقالت لي معلومة انه الخرطوم السنتر ما مخططة بشكل يسمح لانها تحتمل مظاهرات ولذلك التظاهر - في ظل مستوى بطش النظام الحالي - بيكون داخل الخرطوم مدته قصيرة جدا.

في بداية الحراك في كانون الأول / ديسمبر الاول امبارح ده كأن الوضع النفسي لكل الناس مختلف. عشان كده لازم نشوف الامور بعقلانية....

وطول ما ان المظاهرات «بارت تايم» طول ما انه ممكن أقول: «والله اتاخرت. بعد ده لازم ارجع لانه ناس البيت حيدقّو جرس». طول ما انه «بعد شوية الشارع بيروق وبنقدر نرجع بيوتنا». طول ما الثورة ما عندها عواقب وظروف بتِتْفرض على الناس كلها وبتغيير مسار يومهم وخططهم، فاحنا حقو نوافق على انه دي البشاير عشان نقدر نَقل روحنا للمرحلة الما بعد البشاير.

لازم نعرف روحنا وين عشان نقدر نوصل للمرحلة المقصودة.

ولو رجعنا بزاكرتنا ليوم «إستاد الهلال» في شهر كانون الأول / ديسمبر كنا حنطير للسما وقايلين الصباح ما بيصبّح عليهم - وحسي رغم انه اليوم ده ما بعيد لكن لما نتذكره حنشعر انه تاريخ. يعني القصة عاوزة واقعية وعقلانية ونَفَس طويل ولا افراط في شَوف الامور بشكل ايجابي ولا سلبي.

المقصود: مرحلة، نمرق ونتظاهر ونرجع عادي نواصل حياتنا خلاص كفاية (عايزة اضطر ابيت في حتة عشان الشوارع مقفولة) - مرحلة في حياة تانية خااالص مستمرة بشكل موازي زاد استمرارا وبَقى مستفز - مرحلة المناوشات طوّلت وبقت معاطة وزي الرياضة بتاعة الجري على آلة الجوغنغ.

رمزية الاماكن

- مرحلة التمسك برمزية الأماكن كفانا منها. والاختيار على أساس منطقي وعملي وبناء على نتايج التجارب في الشهر ونص الفاتو...

الي الان حيّ بُري ومدينة امدرمان اكتر مناطق استمرت فيها المظاهرات/اتحركت فيها مواكب من نقطة لنقطة وبالذات في موضوع المواكب ده فامدرمان تكسب ...

اخر قول حقوله في قصة السوق العربي ومنطقة الخرطوم عموما: اذا الغرض هو لفت أنظار الاعلام لانه موقع مركزي فالإعلام بيلافت لما هو مستمر بغض النظر عن المكان. واذا الغرض جذب وكسب الفئة من الشعب الما عندها فايس بوك وما داخلة جوّة موضوع الحراك ده سوا كانو في أطراف الخرطوم او غيره، فديل ما بينضمو للحراك لما يلقو مظاهرة كل أسبوعين بالصدفة في موقف العربي. ديل دايرين شغل تعبئة جد وشغل على الارض ولازم نتذكر انهم ألمرحلة بتاعة انه يقولو الرووووب الاحنا ياادووووب وصلناها هنا في الخرطوم، هم وصلو ليها زمااااان من ما كانو في الأماكن النزحو منها وجو سكنو أطراف المدينة. مرحلة الانفجار دي وصلوها ثم تجاوزوها وسكت.

فعشان ينضمو للحراك أبداً ما حيكون بانه يصادف مظاهرة في العربي، حيكون بانه يحس انه الامر مجدي وانه هو زاتو ليه نصيب في نجاح الثورة. لانه الزيهم اتعودو انه ما ليهم نصيب في الخير وانه نصيبهم الأكبر من الخراب وبالتالي ما عندهم لا عشم ولا دافع وما عاد عندهم الكتير اليخافو انهم يخسروه ولذلك بيعشو اليوم بيومه وأقصى طموحهم انه تصبح عليهم الواطة وينجزو رزق اليوم الواحد وبس لا معنين بسياسة ولا «كاش» ناقص ولا بنزين معدوم. وكان على الجوع فمتعودين عليه لأنه وصل عندهم من بدري من قبال ما يجو الخرطوم اصلا ويسكنو أطرافها.

فمظاهرة في العربي يلاقوها بالصدفة ما بتكون عندها أثر في نفسهم غير انهم قد يرجعو يحكو عنها لمدة دقايق لما يرجعو بيوتم البسيطة.

من التظاهر الى الاضراب

اخيراً...اظن مهم نبتدي نعلن للمرحلة بواقعية شديدة وانه اصبح لابد للانتقال تدرجيا البعده. وبالتالي نبتدي نتكلم مع بعض ونتبادل الأفكار والمعلومات عن أهمية الإضراب، عن أهمية المشاركة فيه وعدم الاستهانة بأثر مشاركتنا. اظن نركز في اننا نبتكر طرق بسيطة في شرح الفكرة من الإضراب. كمان نشوف هنعيش كيف جوة بيوتنا اثناء الإضراب. حناكل كيف حنشرب كيف حنتعالج كيف في حالة الوعكات البسيطة حنقضي وكتنا كيف ونستثمره لو ما كنا في الشارع بنتظاهر الخ

الأطفال

لي كم يوم بفكر في انه من أكثر المشاهد بهجة ومؤثرة في المظاهرات هي مشاهد الأطفال

ما بقدر أنسى في بدايات الثورة صورة شهيد الجزيرة ابا شوقي وهو يقود المظاهرة ببسالة وبقوة وشموخ واصرار واضح بظهوره في تلات تظاهرات في ايام مختلفة بنفس العزم والصمود والثبات.

من المشاهد الفي بالي برضو منظر الاطفال في حي بُري المشاغب وهم بيطلو من راس الشوارع المتفرعة

برااااحة وبشيطنة مستترة عشان يشوفو الكجر جاين ولا لا ولما يشوفوهم ما تلقو الا رجلينم الصغار وهي في الهوا وفاكين الجرية فريرة وبيضحكو ضحكة عفاريتية وبصوت عالي يكوركو «جاين جاين شوفناهم» واصلا ما بكون طولم اكتر من ٤ - ٥ أشبار من الأرض...

وفِي صورة الاتنين القاعدين فوق الجرادل استعداداً لصيد البمبان وبيعاينو لاخوانم الكبار وهم بيناورو في الكجر ...

والأنيقة القيافة بالبمبي الثائرة الصغيرة المّرقت مع والدها بعد ما الحّت عليه يسوقا.

وطبعا ما ممكن ما أذكر البنت صاحبة المشهد السينمائي والڤيديو الشهير في بُري ... وهي واااقفة تهتف «الطلقة ما بتقتل / بيقتل سُكات الزول.»

واكيد في مشاهد وحكاوي اكتر واكتر لاطفال ثورة كانون الأول / ديسمبر ٢٠١٩

ربنا يحرسكم بملائكة الارض والسما ويحفظكم ويرحم الشهيد الصغير شوقي ويلهم اهله الصبر ويقدرنا نتمها على خير ونسلمكم بلد زي ما بتستحقوها ان تكون

فإذا اتفقنا انه المهنيين ملح الثورة فانتو بالتأكيد سكّرها

وعشانكم تسقط وتسقط و #تسقط-بس

والحقيقة هي بعمايلكم دي يبدو انها اصلا سقطت.

١٠ نيسان/ ابريل

الحالة في الاعتصام

‏للناس العايزه تتطمن، في القيادة الحاصل كالآتي حتى الآن:

١- متاريس فْل حول وداخل الإعتصام مسامير أسلاك شائكة حجار أي شي يخطر على البال في متاريس أعلى من طول الزول زاتو. الليله الكجر الا يجو برجلينهم. تاتشر كان نطط ما بيخش ولا دبابة حتى ما بتقدر تخش.

٢- الأعداد كبيرة جدا وماشة في زياده والحماس في السماء ومنتظرين كلاب البشير وقرد الفحم يجو

٣- الموية والأكل متوفرة جدا أشكال وألوان وخِيَم الإسعافات متوفرة وكلوو ظابط.

‏٤- الكهرباء ما قطعوها وأمجد إستور دعم الإعتصام بـ «بوربانك» وشواحن و وصلات كهرباء وكلو تمام.

٥- كشافاتهم فوق وموصله وجاهزة إحتياطي لو قطعو الكهرباء وساوناتهم تلعلع.

‏٦- الجيش مشى اتأكد عليهم بنفسه ولقاهم نفس الأبطال حقين أمبارح وجاهزين وقالو ليهم والله الليلة الا يطيرو. كان جو ما ناسين دم أخوانهم الإستشهدو. ربنا يرحمهم. الليلة ما مرتكزين لافين معانا عديل في الميدان بيطمنو على الناس وبيدوهم نصائح للترس والتقفيل.

‏يعني كل الأوضاع تمام التمام لحدي آسي والحمد الله وما ناقصهم الا دعوات الناس ولو في ناس بتقدر تصلهم تكترهم يكون ممتاز جداً.

(منقول من Younes Saifuddin Jr.)

١١ نيسان/ ابريل

- انا إفريقي أنا سوداني.

- احتجاج تضامنا مع المعتقلات من نساء السودان الاحد ١٠ شباط / فبراير ٢٠١٩ امام سجن النساء بأم درومان

- «لن نتراجع شبراً حتى إسقاط النظام كاملاً، وتسليم السلطة لحكومة انتقالية مدنية وفقاً لما أقره إعلان الحرية والتغيير الذي تواثقت عليه جماهير شعبنا العظيم. لن نبرح الشوارع حتى تنفيذ العدالة الانتقالية قصاصاً لكل شهداء شعبنا واسترداد أموالنا المسلوبة من سارقي المال العام»

(قوى إعلان الحرية والتغيير)

١٢ نيسان/ ابريل

تعليمات في الحصار

كلام كده بالوااااضح للماشين القيادة واصلو ما في زول عندو رفاهية انه يتلاطف في الكلام في ظروف زي دي ولا يحاول يجملو ويرش عليه سكّر !!

- انا وداخلة اول امبارح، في بنات كانو بينقو معترضين انه اتفتشو كتير وفي وحدة قالت انه في بت من لجان التفتيش قالت ليها لو ما عاجبك ارجعي بيتكم فهي كانت «عاوزة تكفتا» – لا يا حبيبة تتكفتي انتي وايوة لو ما عاجبك ترجعي بيتكم (في ناس مراهنة بارواحا جوّة وما عندنا مساحة نراعي لضيق اخلاقك

- اذا في ضرب رصاص الانبطاح (تماما) على الارض ما عيب ولا معناها جبن وانه نتذكر السلوك في الزحمة معدي يعني البيرفع راسو او يقوم بشكل غير مباشر بيدي اشارة خاطئة للي حولو انهم يعملو زيو فبالله نكون مسؤلين.

- لقيت كم بت وولد شايلين ليزير !! احنا ما في منتزه ولا موول!! الليزر ده لو جا على زول ممكن يرعبو لانه ممكن يفتكرو قنّاص ده غير انه ممكن لو في قنّاص الناس تتلخبط وتفتكرو لايزر وما تتفاد…

- لجان التفتيش عموما والبنات بالاخص ما تتهاونو في التفتيش ابدا بكل زوق ولطافة تفتشو تفتيش جيد جدا مهما أخد وكت. ارواح الناس وسلامتا معتمدة عليكم / ن. انا شخصيا لقيت حاجات انتو ما لقيتوها وفي كم وحدة غيري. التفتيش لو ما بتقدري تعمليوه بجدية ما تتطوعي أنك تقومي بالدور (المهم) جدا ده.

١٢ نيسان/ ابريل

الشيوعيون والصلاة والمرأة والعورة

- اخر كلمة:

كل بني ادم داخل المنطقة دي يتذكر انه قبل ايام قليلة في ثوار وجنود ماتو في الزلط ده فنرجو نتذكر اننا جاين اعتصام وما منتزه ولا موول. نحاول نخلي وجودنا ايجابي ومفيد وما (هايف)

شا الله الناس المُخّها فيه كستر Custard ( الحلوى الهلامية) البقولو الشيوعين الكفار يكونو شافو صلاة الجمعة في القيادة. عارفين فيها كم شيوعي ويساري وعلماني؟ في شيوعي وعلماني بصلي، وفي شيوعي وعلماني ما بصلي، وفي ما شيوعي ما بصلي، وفي ما علماني ما بصلي. وكم الما شيوعين ولا علمانين وما ليهم علاقة لا بيسار ولا علمانية وبرضو عادي ما بصلو؟ كتااااار!!!

يبقى بلاش نستخدم مقاييس هبلة بليدة وعقيمة...

الكفر هو ما فعله الكيزان فينا.

ويا ناس، الخروج عن الحاكم حرام. الاخبار شنو؟ إن شا الله طيبين.

انتو مخّكم فيه ودك عديل. حاكمكم الما دايرين تخرجو عليه، خرج عن حكم الله واداهو ضهرو وضرب طناش. بل وصل حد من الافترا والبلطجة انه كمان يستخدم احكام ربّو عشان يعلل ويبرر ويمنطق وَسَاخاتو وجُرمه. فبلاي اخرسو واتلهو بعد ده...

المهم انسانيتك دي تتنفسها وتعمل بيها في كل صغيرة وكبيرة وذمتك وضميرك كان رميتم تترمي طوالي بي وراهم….

الحركات المندسّا (بجبن) ورا طرف جلابية الإسلام دي لو ما اتوحشت وشفطو منك انسانيتك واتحرمنتا زي حرمتهم ونافقت معاهم ما بيامنو ليك ولا بتبقى منهم.

الكفر والحرمنة عند البستخدمو الاديان لتبرير وتحقيق اجرامهم وحجب امراضهم النفسية. وجوّعونا واشتغلو بدقة على تجهيلنا ونهبونا وعفّصونا عفيص.

والبقولو صوت المرأة عورة وانه هي ذاتا عورة. ويمشو يعاينو ليها بخرم الباب في مساحاتها الخاصة ويعملو حسابات وهمية في فايس بوك يحاولو يوصلو بيها للبنات عشان يتواسخو. لانه صنفهم كده. خريطة مخّهم عاملة كده. يتخفّو ورا دين. يتخفو ورا حساب وهمي في فايس بوك. يتخفو ورا اي حاجة لانه حقيقتم بشعة وما بتتقابل.

ديل الكل ما شافو أنثى ما خطر ببالهم الا شي واحد!

ديل هم البِسمّو روحهم «النسر المفترس» و«النمر الأسد» و«العَو العَو» و«المارد» الشنو ما بعرف داك. لأنهم عندهم أزمة ضآلة وجسارة المرأة بتألمهم وتورّم قلوبهم وتزيدهم ضآلة وبيحاربوها حتى بدون اي منطق موزون يسعف موقفهم.

لو لغاية حسي ما فهمتوها، وما وقعت ليكم يبقى خليكم زي ما انتو لانه أفضل شي ليكم ويناسبكم ويليق بيكم وتستحقوه بجدارة هو جهلكم وبلادتكم دي.

على قول الابنودي: «وربّنا رازقه بجَهل غانِيه عن كل العِلم»

١٣ نيسان/ ابريل

كنا بنهتف نقول «يا العنصري المغرور / كل البلد دارفور».

وحميدتي قاتل أبناء دارفور أصبح نائب رئيس وفريق اول!

١٣ نيسان/ ابريل

مهندس الاباده الجماعية بدارفور عمل بقوات حرس الحدود سابقا بفوج الرابع زالنجي منذ ١٩٩٠ حتي ١٩٩٨ رتبة ملازم اول حتي رائد و من ثم مدير مكتب الفريق الدابي بالجنينه و منه ملحقا عسكري بالصين و بعد احداث دارفور تم تعيينه معتمدا بمحلية غرب جبل مره نيرتتي و منسقا لتسليح الجنجويد طيلة وجوده بنيرتتي و بعد تم ترقيته لرتبة لواء تم تكليفه منسقا لقوات الجنجويد مرة اخري الا ان تم ترقيتة الي رتبة فريق.

يا هو ده البرهان!

إما حكومة مدنية أو ثورتنا مستمرة.

١٣ نيسان/ ابريل

لم تسقط ولن نسكت

١٤ نيسان/ ابريل

يافطة «النساء المغتصَبات يطالبن بمعاقبة الجنجويد المرجمين عاجلا»

١٤ نيسان/ ابريل

التزم انا اريج زروق مواطنة سودانية اطالب بحقوقي بدون اي تنازلات ولا كلام نيّ. وبأن استمر في التظاهر والاعتصام حتى يتم تنفيذ (كل) المطالبات المذكورة بنص اعلان الحرية والتغيير ونسف هذا النظام الفاسد الملوث الموبؤ من جذور جذوره. كما التزم باني احمي جنود الجيش القامو بحماية المواطنين. واجبنا نحميهم من اي حكم تعسفي باعدامهم. ارواحهم في ايدينا ما نخذلهم لأنهم راهنو علينا وجازفو بحياتهم عشان يحمونا...

ثوار احرار حنكمل المشوار.

١٥ نيسان/ ابريل

محاولات فض الاعتصام دون تحقيق المطالب، مؤشر لعدم التزام المجلس العسكري بما عاهد عليه الجماهير.

١٦ نيسان/ ابريل

بالبيحصل ده، البلد دي ما مفروض نستلم مفاتيحا. مفروض نغيّر القفل عديل.

ديل واضح انه عندهم مليون نسخة. القفل بيتغيّر في القيادة بس!

١٨ نيسان/ ابريل

[تظاهرة حيّ] بُري!!

دي ما مليونية دي مليارية عديل

١٩ نيسان/ ابريل

الشعب يريد بناء سودان جديد.. موكب المهندسين.. حَنِبنيهو!

٢٠ نيسان/ ابريل

اهل الشهيد كابتن طيار جرجس. من اول الشهداء وضحايا هذا النظام / ١٩٨٩...

٣٠ سنة وجع، ٣٠. سنة صبر.

٢٠ نيسان/ ابريل

العلمانية: فصل الدين عن الدولة

الكيزانية: فصل الدين والكهرياء والموية والبترول والغاز والراتب والمناهج المدرسية والخدمات الصحية وجنوب السودان وحلايب ودارفور عن الدولة (نقلا عن أبو طويلة)

٢٣ نيسان/ ابريل

حادثة شهداء «كُتُم» ٢١ نيسان / ابريل ٢٠١٩ - شمال دارفور - موكب ضحايا الابادة الجماعية، كانت اكتر من كافية لأن نتأكد انه قصة التفاوض مع المجلس العسكري دي تترمي في سلة النفايات وانه لم تسقط بعد والاعتصام مستمر ...

كلام بديهي إتعاد وقلناه كتير لي بعض ومع ذلك حقو كل ربع ساعة نذكر بيه روحنا

«كل السودان واحد ومافي دم أغلى من دم»

٢٣ نيسان/ ابريل

ويا نسايم عطبرة الحلوة

قطار عطبرة في الطريق لـ #اعتصام-القيادة-العامة

٢٧ نيسان/ ابريل

إقتل وإذبح وإسجن تاني

فكرك يعني مش ح نثور

زيّك زي الكلب التاني

بكره حييجي عليك الدُور

٢٩ نيسان/ ابريل

دا كان وحيفضل أجمل يوم في تاريخ حياتنا

لمن شعرات جلدي قامت ورجعت اهتف باعلي صوت «الشعب يريد اسقاط النظام»

وسقطت يااااخ

٣٠ نيسان/ ابريل

موكب ناس دارفور، الناس الصابرين.

٣٠ نيسان/ ابريل

اي زول يتحرش ببِتّ او اي زول / ة يقولو ليها كلام ما من حقهم يقولو او تعليق مستفز في أمر ما بخصهم / ن. اي زول / ة يفتعلو مشكلة أو خلاف. اي تصرف من اي كائن اي كان هو منو او تبع شنو داخل ارض الاعتصام لخلق مشاكل وفوضى وحجج فارغة تؤدي لأنها تكون مبرر لتدخل من اي قوات عشان يبقى حجة لفض الاعتصام؛ يترد عليه باخد صورة فوتوغرافية سريعة ليه / ا

(حتى كمان الناس الحولهم وشاهدين، لازم ياخدو صور عشان كان في صورة ما طلعت واضحة يكون في غيرا)

والصورة تنزل فورا وتنتشر في السوشيال ميديا.

ما حنردّ عليك / ي .. بسلمية حنصورك وعادي نفضحك.

ا أيار/ مايو

حميدتيتيتي عامل زي الواقف بسمكة على الشاطي وبيهلل (ومقتنع) انه انقزا من الغرق!

٢ حزيران/ يونيو

استفتاء

هل توافق ان تكون الرئيسة القادمة لجمهورية السودان امرأة؟

سؤال من هاجر مكاوي

٦ أيار/ مايو

عيد الفطر

كل سنة اول يوم بفطر عند ناس حبوبتي [جدّتها] بحكم انه مع الاهل والبيت الكبير وكده. دايما وابداً حبوبتي صحبتا حلوة في رمضان وبدون رمضان لكن السنة دي كل الاهل في القيادة. السنة دي القيادة هي البيت الاكبر. كل سنة وانتو طيبين. رمضان كريم

٦ أيار/ مايو

الثورة تعود لشعبها

اقعدو في كراسي مخكم. خليكم حكيمين والتزمو بالشعب. بدل ما الشعب يلتزم بتقعيدكم في عُلبِكم باسخف الطرق.

ليه كل نشطاء السياسة مصرّين. يقدموا نفسهم كصوفيي سياسة ودراويش ومن اهل الزُهد السياسي؟

الحياة كده. امسك لي واقطع ليك وكفانا رومانسية ساذجة واستعباط على بعض.

انتو (اخترتو) انكم تتصدروا للدور ده بدافع شي من الوطنية وكمان بدافع الطموح في مكاسب معنوية وتقدير. وبدافع الآمال التي تبدو خجولة في مناصب قيادية. وكل الشعب عارف ولاقط ده وإن كان غير معلن من قِبلكُم وإن لم يواجهوكم بيه (وده ما عيب إذا كنتم اهل له).

اما دافع الرفض للظلم الكان بيحصل وللنظام الفاسد بشكل عام، فده (المفروض) هو العامل المشترك بين قوة المعارضة السياسية (حضراتكم / ن) وعموم الشعب.

تمام؟

يعني كل الأطراف عارفة انه القصة ما بلوشي ولا مجاني ولا عشان خاطر عيون الشعب بشكل حصري. وإنه في دوافع شخصية جدا داخل كل / اغلبية من سنتر روحو في موقع قيادي ووكّل نفسه، سوا دوره صغر ام كبر.

تمام جدا.

واحنا كمان. وافقنا وقلنا أمين مقابل تراعو مصلحتنا رعاية شديدة وإنكم تتكلموا بالنيابة عننا (لصالحنا) وتسلمونا بلد ونسلمكم تأييد وتقدير، الخ.

ليه بقى الهرس والكلام الكتير ده واللف والدوران. بتصيعو على منو؟ على الشعب؟

يبدو أن الثورة ستعود حيث آبتدت: لشعبها.

٧ أيار/ مايو

لسة في جولة قادمة.

نقول: خير، وبعدها نشوف.

٧ أيار/ مايو

تضامن انجيلا دايفس

Angela Davis to the Sudanese activists on the ground.

من انجيلا دايفس للثوار السودانيين على ارض الحدث

(شكرا للشاب الْقِدِر يصوّر معاها)

٩أيار/ مايو

حان وقت فرض السلطة

حان الان وقت فرض السلطة بدون استحياء ولا استاذان ولا تفاوض ولا كلام كيووت. بلا ما نكون عنفين معاهم بلا كلام ني.

١٢ أيار/ مايو/ هذا هو الرد

على سؤال: انت منو؟

[صورة ٤ انت منو؟]

١٢ أيار/ مايو

خططكم مكشوفة

«الي / جهاز الامن المنحل قريبا. لعناية (الفنية) موقف شندي.

...تلميحات سريعة لدينا جميع ملفات خططكم الفاشلة موثقة.

اولها خطة الفتنة بين الثوار والقوات المسلحة والدعم السريع وثم السيطرة عليها ميدانيا.

خطة رقم ٢: التحرش بالكنداكات داخل ميدان الاعتصام وتم تكوين لجنة مختصة. والبتقبض داخل الميدان المرة دي التعامل معاه حيختلف.

خطة رقم ٣: ادخال اكبر عدد من عصابات السرقة والمتفلتين داخل ميدان الاعتصام وتم رصدها

خطة رقم ٤: ملف اشانة السمعة لقوي الحرية والتغيير والتشكيك في تجمع المهنين لايقاع الفتنة بينهم والثوار.

خطة رقم ٥: اغتيال شخصيات من الناشطين داخل الميدان بعبارة (الزول ده كوز) ولم الحشود حوله تم معالجتها وجربو داخل الميدان الان قولو (الزول ده كوز) وشوفو النتيجة الكوز بنعرفو من عمايلو وسلوكو.

خطة رقم ٦: الخطة البديلة: (الاختطاف. ودي كمان عممناها على كل المتاريس ولجان التامين والاحياء.

هل ولا ما هل كفاية وإلا نواصل؟

عليه عارفنك اشفت زول في الفنية والجماعة معتمدين عليك في توصيل الرسائل بقنواتك الأمنة وادارتها

وعارفين كمان تاريخك وآخر مشاكلك في الجهاز وملف اغتصابك للبنت xx وصورك، بياناتك، اسرتك. سكنك، قنواتك، حساباتك من vote-1 الى vote-105 مخترقة.

وأبعد من حي الملازمين والازهري يا ود الكلاكلة لانو قربنا عليكم.

لمّن يجي وقت الجرد والحساب.

لسلامتك وضمان مستقبلك بنحذرك لاول واخر مره: ارقد عشان ما تتجرجر والبتعمل فيهو ده موديك لمشنقة.

اللهم قد بلغنا فاشهد

#اعتصام-القيادة-العامة»

(تجمع مهنيي التقنية والاتصالات)

١٢ أيار/ مايو

نقلا عن بوست لمحمود احمد:

البيقدر يجيب كماما وخميرة وغير من معِينات البومبان للشباب في كوبري الحديد شارع النيل، يعمد كدا.

وقفة موظفي شركة الكهربا تمّ فضّها ببومبان قبل ساعة.

نكون جاهزين!

١٣ أيار/ مايو

... في مقترح انه كل مجموعة يتشاركوا في خيمة زي حقت الجيش كده. والعندهم استطاعة ممكن يتشاركوا في مكيّف موية وكل مجموعة من الخيم يشتركو في إيجار مولد كهربا صغير أو يوصلو اذا كان متاح من الماكن الحولهم او المهم يتصرفو ويشوفو كيف ممكن يسهلو على نفسهم القعدة في وكت النهار الصعب. ده غير انه اصلا في صيوانات راكبة وممكن تكفي عدد معقول من الثوار. المهم حراسة حقنا واجبة بدون نداءات ولايافات وبيانا.

ننظم نفسنا الايام الجاية على كده....

وكمان من اللائق ان يشمل الكلام ده (كل) النشطاء السياسيين وقيادات واعضاء الاحزاب والكيانات السياسية البتمثل الشعب. برضو صبوها مع الثوار ولو مشغولين ممكن تتناوبو اوتشوفو ليكم صيوان تصبوها فيه وتشتغلو عادي جدا المافي شنو؟

 

الانترنت بيتجاب واي شي ممكن تحتاجوه ممكن يتوفر داخل صيوان كأنكم في معسكر .

(اما إجتماعاتكم ممكن تعملوها خارج الاعتصام وتعودو وده لأهمية السرية في التخطيط )

وحتى ممكن صيوانكم يكون بعيد حبة حبتين عشان تعرفو تركزو وتتفاكرو وتمخمخو وكده.

المهم تصبّوها مع الناس، وتحديدا في المواعيد الحرجة.

وما حتكونو اول ناشطين او سياسين في العالم تعملو كده. فعلى مدى التاريخ القديم والحديث الناشطين والقيادات السياسية بتكون في قلب الحدث بل في الصفوف الامامية وقبال الناس وده لأهمية أثر دعمهم وتشجيعم وتوجيهاتم بشكل مباشر. (وما بقصد مخاطبات وكده) وخلق مناخ أليف بينم وبين من فوضوهم للتحدث باسمهم ولزايدة درجة إيمان الثوار بأنه اختيارهم لأنكم تمثلوهم كان اختيار صائب ولحاجات تانية كتير يطول شرحها واصلا ما ضروري شرحها حسي المهم في الظروف دي صُبّوها مع الناس وخلاص...

واذا شايفين انه حراسة الحق و الميدان اقل منكم / ن يبقى انتو اقل من انكم تقودو حتى شارع في السودان.

١٤ أيار/ مايو/ حيّ على الاعتصام!

- تاني. امرقو تعالو القيادة. ما عندنا حل تاني.

- امرقو تعالو على الاعتصام.

- قوش عاهر يدير جهاز عاهر قواته قوات عاهرة! والمجلس الجبان الساكت قاعد يلطم ويولول مجلس عاهر!

- محتاجين عدد ٣٠ متبرع / ة بالدم من فصيلة O- في بنك الدم مستشفى التميز (الأكاديمي)

شير share عاجل.

- شارع النيل / شارع الجامعة محتاجين عربيات تشيل مصابين ونساعد عربيات الإسعاف.

- حتى لو طبّيا في نظرية بتقول انه البنات ما يتبرعو بيدم عشان احتمال إصابتهم بهبوط احتمال وارد لتكونهم الجسماني او غيره من نظريات وتنظير، فالجسم البيمرق منه بني آدم أقوى من تنظيركم ونظرياتكم الطبية.

- العقلية الكيزانية الجاهلية المعفنة دي ما ممكن تكون ورانا ورانا حتى في اللحظات الصعبة الخطر دي !!

- رفضو لصديقاتي التبرع بالدم خشيتا ان يصابو بهبوط.

الناس دمها سايح وانتو خايفين عليهم من هبوط ممكن اسعافه في ربع ساعة بكباية عصير وإلا سُكّر بموية!؟

بلا تخلف!

بلا شغل جهل!

- محتاجين اطباء في عيادة التدريب المهني.

شير سريع ..

Blood donations needed urgently - Donations at the

National Central Laboratory - Fudail Hospital -

Royal Care Hospital - Al Moalim Hospital

في احتياج شديد للتبرع بالدم - التبرع بمعمل استاك - مستشفى فضيل - مستشفى رويال - مستشفى المعلم

١٤ أيار/ مايو

دم الثوار في الشارع سايل

#لن-نغفر

#لن-ننسى

١٥أيار/ مايو/ الدم قصاد الدم

الان من أرض الاعتصام... نحرسها لما نستلمها صح.

ألدم قصاد الدم، لو حتى مدنية

مدنية أو ما مدنية، دم الشهيد هو القضية

أصبح الصبح، فلا السجن ولا السجان باقٍ

١٥ أيار/ مايو

«شجن» كاتبة شنو؟

«شجن» كل يوم بتجي تزور المصابين في المستشفى وبتقرا ليهم الورقة كتبت فيها شنو؟ قبل ما تمر على بقية المعتصمين في الميدان.

حتى لو كانوا المرضى نايمين

وسبحان الله الناس الصاحية اول ما تدخل عليهم يسألوها اول سؤال «أهاي شجن الليلة كاتبة شنو؟)

١٥ أيار/ مايو

في السياسة

...اذا بتتكلم سياسة يعني بتتكلم عن الحياة. واذا بتتكلم عن الحياة فحق «الناس» يكونوا بوصلتك.

اما الثوار وقلبهم شايل همّ البلد دي بحق فعليهم / ن بالالتزام بالاعتصام ليل ونهار.

١٥ أيار/ مايو

بيع وشرا

احنا شايفين منو البدفع التمن لكن لا شايفين الباع ولا عارفين الاشترى!

الاصابات بتزيد.

١٧ أيار/ مايو

ثلاثة رصاصات لـ«دودو»

يه!؟

بيرفع علامة النصر لآخر لحظة.

الشهيد الصغير الدودو.

تلاتة رصاصات لي ده؟

وانتو تستحقو شنو؟

كل مرة افتكر انه خلصتو الجرم البيجيب ألم، بيشلّ اللسان عن الوصف، القاكم بارعين في خلق ألم اكبر.

الايد الداست على الزناد، يا ربي، تشوف أضعاف الألم ده في كل ثانية وكل لحظة. ما بحس براحة.

٢٢ أيار/ مايو

لمحاكمة منتسبي الحركة الاسلامية

أنا المواطنة جيهان الطاهر

أطالب بمحاكمة منتسبي الحركة الاسلامية من مؤتمر شعبي ومؤتمر وطني لسرقتهم احلى سنين في حياتي وللضرر النفسي والبدني على المستوي الشخصي.

واخص اخوات نسيبة والدبابين الارهبونا وطلعوا ميتين ابو اهلنا في الجامعة وعلى المستوي العام

محاكمة كل منتميّ الحركة الاسلامية في التسعينات الكانو شاهدين على مجازر العيلفو وشهداء الحركة الطلابية وبيوت الأشباح واللي قبضوهم في دفارات الخدمة الإلزامية وقتلوهم في الجنوب والضحايا الجنوبيين ومتضرري الصالح العام.

واي حاجة تانية نسيتها.

#تسقط-تالت

#مدن-السودان-تنتفض

#حميدتي-تعال-افصلني

٢٢ أيار/ مايو

الهبوط الهاديء والهابطون

البشير ما اتخلع بتفاوض. اتخلع بإرادة الشعب وإصرارو ودمو والتزامو بثورة من اول يوم. الشعب كان مستعد انه يقدم فيها كل التضحيات.

لا كنا ضامنين انحياز من جيش ولا من قوات دعم ولا من جِنّ. مرقنا وبس

اعتصمنا يوم ٦ نيسان / ابريل واتحامينا في ضهر نزاهة أفراد من الجيش واتقوينا لما شفنا انه ضمايرهم الصاحية معانا وأنهم واقفين في صفنا وبالتزام شديد تجاه ناس بلدهم وبواجبهم والقسم الحالفناهو ... وبرضو سال دمهم. سأل دمهم لما اتصدروا للرصاص بدالنا.

الشعب والجيش ده وين في حسبة إلسمحو لنفسهم انه حتى يخطر ببالهم «هبوط ناعم» (سياسة حزب الأمة).

إذا التفويض ضمني، فأنا لم افوّض اي شخص أو كيان لأن يقدم تنازلت عن مطالبي أو يقبل بمساومة بالنيابة عني... ولن.

فوّضت من أجل حكومة مدنية ومجلس سيادي مدني ورئاسة مدنية بتمثيل عسكري محدود وبس

وانا لست مفعول به. انا فاعل.

فيا ناس الهبوط الناعم. يا هابطين.

عارفنكم ككيانات وعارفنكم كأفراد والسودان ده ضيق....

ما تهبطو بالثورة عشان ما نعمل ليكم هبوط حاد في الحالة النفسية واطماع (بعضكم) وتهاون (بعضكم) يبقى ليكم بمبي بعدين.

اعلنو الحكومة. راسلو بشكل رسمي البعثات الدبلوماسية والمنظمات ككيان مفوّض من الشعب بهيكل الحكومة (المدنية) وتفاصيلا وانتهى!

اعلنو العصيان التام والإضراب وحثّوا على الالتزام بالاعتصام بالتوازي وانتهى!

بعد داك، قفلو النَقّة دي وامرقو من غرف الاجتماعات المملة وصبوها في القيادة وانتهى!

قد تحدث سيناريوهات غير متوقعة لكن في الحالة دي بنواجهها وإحنا متحدين والييبقى بيبقى على الكل.

وحننتصر!

٢٢ أيار/ مايو

يا حميدتي

حميدتي فاهم نفسو غلط.. قايل نفسو بيتكلم مع قبيلتو النصها اولاد عمو ونصها التاني اولاد خالو وهو ولي النعم وسيد الرأي.

يا حمديتتتيتيتي دي دولة واحنا شعب. كده كُخ، يا بابا. كده عيب.

٢٢ أيار/ مايو

مدنية (بتمثيل عسكري) والرئاسة مدنية!

٢٣ أيار/ مايو

صباح الخير، يا بلد!

ما عارفة ليه لكن أصلي ما خايفة ومتفألة.

قلبي بقول لي اننا ان شا الله منصورين.

(لابد من يوم موعود تترد فيه المظالم)

صباح الخير عليك يا بلد. صباح الخير على ارواحكم الحارسانا، يا شهداء.

٢٨ أيار/ مايو

رمضان، حَرّ، رصاص، إصرار

دخلنا القيادة وزي الموج بلعنا التاتشرات ومجارمة الأمن وأثبتنا انه احنا ديل القيادة.

قالو القصة صعبة ودايرة صرف والقُعاد حار. لقينا روحنا بندير في دولة، اكل وشراب وعلاج ونوم وقيام وخلاف وصلح وتوعية وهمّة وعزم وفن وفكر ومحبة وودّ ودفء وصبر وصمود.

قالو: رمضان جاي والشمس حارة ودي شغلة صعبة الناس ما بتقدرها. اقبلو بقدر الوصلتو ليه واكفّو روحكم شر القتال.

قلنا ليهم: صيام وصبة ونوبات السحور في نص الميدان يزاحم دقاتها صوت الهتاف والإصرار وركوب الراس وسك الرصاص.

وحسي (الآن) الجو زاتو مترّس.

أها.

كل مرة تقولو. وكل مرة نقول «تسقط بس» «تسقط اول وتاني وتالت» لغاية ما تبقى مدنيااااااااو.

فبطّلو قولكم الخايب ده واتلهو.

٢٨ أيار/ مايو

الجنجويد

قوات الاجرام السريع تقوم بتهشيم هواتف موظفات البنك (المركزي) وتعتدي بالضرب عليهن.

شعب السودان: قلبي مالو اليوم من جسمي. فر وراح.

حلوين حلاة.

حديث في التاكسي عن الحزب الشيوعي

قبل سنين كنت راكبة امجاد مستعجلة ماشية البيت أغيّر هدومي عشان الحق تشييع جنازة سكرتير الحزب الشيوعي محمد ابراهيم نقد، الله يرحمو، قام سيد الامجاد لاني بقول له يزيد السرعة كل شوية (راجل عجوز) قال لي انتي ماشية وين؟ قلت ليه جنازة نقد. قال لي: «لا حولا، نُقُد بلاي مات! نُقد ده من ناس زمان البيفهمو وحزبهم ده والله عمل حاجات كويسة للسودان.» وسكت ثم أضاف: «لكن هو حيدفنوه مع المسلمين؟»

الجملة دي وقعت عليّ كالصاعقة. وقَعَدت أفكر انه حتى راجل كبير زي ده محشور مُخّه في فكرة انه الشيوعي منحل وزنديق.

دي مصيبة! شنو، دي ؟!

قمت حكيت له انه قبل كم سنة كنت بغطّي في مؤتمر اليسار وقابلت بنات شيوعيات محجّبات وملتزمات دينيا لما بهناك. موحِّدات بالله وبرسوله والشهادة دي بينطقوها بسب وبلا سبب. وانه في أسر كاملة شيوعية في السودان والاسر دي بتصلّي وبتعوس الحلو مرّ لرمضان وبيصوموا وبعده بيخبزو كحك العيد وبيشترو لعيالم هدوم جديدة.

عادي يعني، ما مقضينها خمر ومَيسر ونساء وسبّ دين (ده شنو؟ جوّ اهل قريش ده). وانه لو حتى ده موجود فدي اختيارات فردية وسلوك شخصي وارد من الشيوعي والغير شيوعي. وانه ان كان في منهم ملحدين فده قرار فردي وهو ناتج عن فكرهم واختيارات وقناعات شخصية. وانه ما في عضو في الحزب بيترفد او يستبعد لانه بيعتنق دين، سوا الاسلامي او غيره، فالدين امر خاص. وانه اي حزب (غير الأحزاب العقائدية) حرصه الاول والاساسي هو الالتزام بالمنهج السياسي (بألايدولوجي) ألهو متبنّيه وبيمثّله بغض النظر عن ديانة العضو. يعني ما في شيوعي أترفضت عضويته في الحزب لانه مسلم وما في شيوعي التحق بالحزب لانه ملحد.

استعجب الراجل وقام رجع لأول الموضوع و سألني، «يعني هو كان مسلم ؟»

اكتفيت بأني ضحكت.

خلص بينا الكلام وبعد ثواني وصلت مشواري ودعته وكل واحد فينا راح لحاله.

بعد ما نزلتا من جواي كده اتبسطتّ من روحي لأنه شعرت اني نوّرت ليه لمبة في أوضة مضلمة جوة مخّو. والنور ده حيخليه يقعد جوة الاوضة دي زمن يبحت ويفكر ويراجع حاجات كتير.

بصراحة انا السيرة دي ما كنت عاوزة إفتحا (هيا وسيير كتير في مواضيع مختلفة). وده احتراما لانه الاولوية لسيرة الثورة الثوار واحتراما للشهدا والمعتقلات والمعتقلين فكنت عاضة لساني وساكتة وكمان التزاماً (بلبانة) ما وكته البقت في لسان الكل وبتتقال بغض النظر عن أهمية طرح الموضوع. لكن بما انه اليلة أتفتح فبالمرة انا حأقول كلامي ونرجع نكمل ثورة ونتذكر انه في الاخر املنا اننا نوصل ليوم يكون الفيصل انتخابات (نزيهة) تحسم كتير من الامور.

العاوزة أقوله هو انه الكلام الساذج الليه سنين حايم عن الحزب الشيوعي «والبعاتي» الوهمي الساكن في عقول الناس وربّاه التنظيم الاسلامي الدولي في العالم، الإسمو «الشيوعين زناديق ومنحلين، الخ. وحيعلّموا عيالكم الفسق والانحلال، الخ. الخ. الخ.»

فبالله عليكم اسألو نفسكم سؤال واحد، تنظيم طاغي متمكن زي التنظيم الاسلامي ده والواضح للعالم انه الدين عنده مجرد حجاب بيآذار / مارس من خلفه كل المفاسد والمخالفات وانه تنظيم مش بس كافر بتعاليم كل الأديان وبالأخص الدين ألهو بيتدعي انه بيمثله بل كافر حتى بالمعايير الاخلاقية والانسانية. فالحزب العاتي الاسلامي الكله جبروت ده، مااااالو الحزب الشيوعي؟ بيزن ليه في راسو وليييه متوتر كده منو ومجنّنه؟ وليه فتحة خشمهم بس طوالي يقول ليك: «ديل الشيوعين الكفار»، ليه؟

الناس تفكر حبّة بدل ما تبلع الأفكار زي الكباسيل [ج. كبسولة] وتكرر الكلام ساكت كده.

الحقيقة هي انه الحزب الشيوعي (عالميا) هو حزب يثقف كوادره وبشكل صارم بيدرجهم في برامج وكورسات بيعلمهم عن كل أمور السياسة والحياة، شي اقتصاد، وشي سياسة، وشي حقوق إنسان، وفن، وادب. فمثلا الكورسات الرئيسية بتكون الديالكتيك، اقتصاد سياسي، أسس العمل تنظيمي، قضايا المرأة، اسلام سياسي، وحاجات كتير عشان تؤهلهم لأنهم يكونوا أعضاء فيه.

والسياسة اصلا عن شنو غير انها عن كيفية إدارة أمور الحياة عن طريق إدارة الدول، إدارة على أساس سليم ومبنية على دراسة وعلم (يعني بيدخلوهم مدرسة عديل) وكمان الغير معروف هو انه الحزب الشيوعي هو شديد العقاب في حالة انه أحد كوادره قاموا باي تجاوز أخلاقي. وايدلوجيتو مبنية على أساس «المساواة في الفرص». يعني عيال الغفير والوزير ياخدو نفس الفرص في العلاج والتعليم وكل تفاصيل العيشة والحياة.

هو مبني على أساس نظريات اقتصادية ونظريات اُخرى.

وقد يكون في تحفظات على بعض نظرياته (زيه زي اي حزب سياسي في العالم)

فنرجع لسؤالي وسبب كتابتي في الموضوع ده: ليه التنظيم الاسلامي الدولي يحمل كل الضغينة دي للحزب الشيوعي؟ وليه بيغذي فكرة انه الشيوعي وحش زنديق لا دين ولا إنسانية له؟ ليه عاوز يخلص منه وليه دايما الحزب الشيوعي هو الحزب الوحيد البتعاملو مع تجمعاتم (مثل تشييع جثمان نقد ومحجوب شريف) بتوجس؟ وقلق ليه بيتعاملو مع اجتماعاتهم وكأنها مخالفة قانونية وبيقوموا بقمعهم سبة بلا سبب؟ ليه كلمة «ديل الشيوعيين» على طرف لسان الاسلامين طووول الوكت ثم انتقلت (بدون تفكير) على لسان اغلب أبناء وبنات الشعب؟

لانه ببساطة التنظيم الاسلامي برغم قوته وطغيانه وتمكنه واستراتيجيته القوية الذكية جدا الا انه عارف انه بينه وبين الحزب الشيوعي في ندية في طريقة التنظيم والتثقيف والعمل الاستراتيجي (والسَسْتَمَة). ولذلك عمل التنظيم الاسلامي على مدى السنين (وما بس في السودان) على انه يهدّ الحزب الشيوعي واستخدم سلاحه الأكثر شهرة (وهو سلاح فرق تسد). ونجح بنسبة كبيرة في تفتيت الأحزاب الشيوعية زي ما نجح في تفتيت الأوطان. ده كلووو بالعربي كده لانه عارف انه الحزب الشيوعي حزب قادر جدا على مناطحتو. هم بس الاسلامين فايتين الحزب الشيوعي بأنهم بيوصلو لمبتغاهم بالخبث وبالحيلة واللف والدوران والرشوة وشراء الذمم. ودي سكك الأحزاب الشيوعية في العالم عموما ما بيمشو فيها ولذلك قل ما بيوصلو للسلطة.

اما عن السلوك (الشخصي) لأفراد من الحزب الشيوعي (وتحديدا في السودان) فللأسف بعضهم اساؤا للحزب بتصرفات شخصية شوّهت صورته في المجتمع وده ساب انطباع سيئ عند الاغلبية في السودان والأنظمة الاسلامية استثمرت في ده ورعت الفكرة وكبّرتها وعملت منها كباسيل [جمع كبسولة] بلّعتها للناس وللاسف اغلب المجتمع كان أكسل من انه يبحث ما وراء الامر.

كان دايما عتابي على أعضاء الحزب الشيوعي (السوداني) انهم ليه ما دافعو عن نفسهم. ليه سابوا المجتمع والإسلاميين يلطشوا فيهم كده وياخدوهم بمأخذ ما فعلو السفهاء منهم؟

عمري ما لقيت اجابة وافية!

لكن يبدو لي هما عندهم حتة شبه زاهدة كده في نفوسهم وما بيعرفو لاستعراض العضلات زي الجماعة ديل حتى لما يحاولو يقدمو عروض ماااا بنجحو وعلى قدر ما ده امر يحمد على قدر ما انه اظن أتسبب في انهم بالرغم من انهم حزب فاهم قدر ده، ما أخدو مكانتم سياسياً ولا حتى في المجتمع. مع انه حزب من كتر عراقته بيدرس عنه في كتب التاريخ السياسي الحديث في المدارس.

وللبيسأل نفسه اشمعنا انا بكتب عن الحزب الشيوعي. فبكتب عنه لاني زمان درست عنه في المدرسة في مادة التاريخ الحديث، وكتها، كان عمري خمستاشر سنة. ولما جيت السودان مرة في اجازة اتصدمت بان الشيوعية تهمة، ايوة تهمة عديل، بل احياناً تقرب تبقى شتيمة....

وللتوضيح والمعلومية، انا ما عضوة في الحزب الشيوعي (والشيوعية ما تهمة بنفيها وإنما هو الواقع اني ما عضوة في الحزب) ولكني يسارية الهوى بفكر انه يمكن تكون حاجة كويسة (وبقتدي باختي الصغيرة توتا في ده) لو في الايام دي نجري الشارع نتظاهر وبعد ما نرجع البيوت لو فينا حبة حيل نثقف نفسنا سياسيا وغيره. نقرا عن التاريخ السياسي ونقرا عموما عن السياسة والاقتصاد وعن كل الأحزاب الفي السودان وحتى برة السودان.

الحراك الفي الشارع لازم يكون موازي ليه حراك في الدماغ والفهم، عشان نجهز للجاي

بغض النظر عن لونا وهوانا السياسي شنو. فنكون ما

نكون المهم الزمن الجاي نجهز ليه وتتخت قواعد سودان جديد على أساس فكر وبي فهم.

ومهما اختلفنا في السياسة فأكيد الروح المجتمعين بيها الايام دي حتساعدنا انه لي قدام دايما نتعلم نستثمر فيما هو مشترك بينا ونتجاوز عن الاختلافات البِتفرقنا.

٢٩ أيار/ مايو

يعني شو موت بالغلط؟

٣١ أيار/ مايو

اللعب بالسياسة ألوان

ارجو مافي زول يجي يقول لي كلامات زي ياها دي السياسة ومافي مكسب ١٠٠ في ١٠٠ الخ الخ. لاني عارفة الكلام ده كويس. ودي اصلا من البديهيات وشرحها يعتبر شرح للمشروح. وسمعت الجملة دي والزيها كتير. لكن اظن انا شفت في الدنيا دي ما يكفي انه يخليني اوصل للنظرية دي وعارفة انه الحياة ما عبارة عن حلاوة قطن خاصتاً السياسة بكل ما فيها من نتانة.

لكن في فرق بين نتايج تفاوض ١٠٠٪ مكسب (لانه ده تطرف في الآمال الوردية) وبين ٢٠ او ٣٠ ونسب خايبة زي دي، لأنها تطرّف في الاستعباط والسرقة.

ونسب غير متكافئة مع التضحيات والجهد البذلو الشعب. في فرق بين انه الناس تلعب سياسة وتوصل لنسب تردّ بعض حق الشعب وما بين تلعب xxxx لا مؤاخذة. وتنهب حق الشعب وتجحف في حقه.

٢ حزيران/ يونيو

افتراض جهل الناس ده حاجة عيب خلاص وتعبانة شديد.

٣ حزيران/ يونيو

على الاعتصام. على القيادة. على حقنا نحرسو!

٣حزيران/ يونيو

فيديو لايف:

«احنا حسّه محبوسين كلنا جوّا. ما اعرف انقطعت الكهربا، اوضة كدا بتاعة كهربا.

وبيضربو في رصاص برّا واحنا جنب العمارة اللي كانوا بيضربوا منها بالاول، كلنا واخدين ساتر راقدين في الاوضه في الارض ولسّه ضرب الرصاص شغّال. الناس تمرق الشارع، الناس تمرق الشاعر، والرصاص زي المطر، الرصاص زي المطر

انا ح اقفل اللايف ده

أبعِد

اركضي يا وئام، اركضي.»

٣ تموز/ يوليو

سلام على كل الناس. والف مليون شكر والله يسلم كل من حمد سلامتنا. انا لسة شوية ما قادرة اتعامل هنا زي اول والاخد والرد صعب على روحي لسه شوية. الاذى الفي الجسم بيبرى مع الزمن لكن لسه الروح موجوعة حبة حبتين. العزاء وقفة الناس ودعمهم والاهتمام والسند والاحتواء وحاجات كتير صعب سردها، لقيناها من القريب وحتى الغريب. والعزاء كمان يوم ٣٠ الفات، فاليوم ده نزل عليّ برداً و سلاماً والف رحمة ونور على الشهدا القدّمو روحم مقابل انه الثورة تستمر واننا نصمد وانه الحصل ما يكسر في روحنا شي.

بوجع شديد غادرنا السودان بعد الحَصل بوقت قليل (الي حين) عشان نتعافى (والحقيقة هي انه التعافي جوا سودان حر ما خارجه) بقدر ما اقدر اقول انه احنا كويسين. بناكل وبنشرب ونتكلم ونضحك ونبكي. ومرات بنسكت. بنسكت كتير ونتذكر لكن لسه جوة قلوبنا امل جريئ.

حأفضل باقي عمري اشكر ربنا انه احنا الستة مرقنا على قيد الحياة واتعلمنا حاجة ما عارفة ليها اسم حسي (الآن / الحين). يمكن في الاول شَعَرنا اننا انكسرنا لكن رغم انه حسي اتفرقنا وكل وحدة فينا في حتة في الكورة الأرضية بس انا أكيدة وعلى يقين انه الكانو معاي في التجربة دي انه في حتة فيهم قوّت، قوت شديد... واذا كان على الاذى الشفناه فلما فقنا استوعبنا انه في غيرنا واجهوا اضعافه وشافو اهوال من التعدي والانتهاكات والبعض كمان روحهم فقدوها....

أدركت انه إذا فعلا كنا نستحق النجاة فلازم نفضل سند الثورة الفدوها غيرنا بروحم وبحاجات كتير..

آسفة اني لسه ما رديت على الرسائل الطيبة لكن حبة وكت واكيد وطبعا لازم حاردّ. فهو اقل شي قصاد كل الود والعناية والمحبة

سلام الى حين اضافة ...التوم هجو راجل واطي ولا يمثل الناس الشالو الثورة دي ودفعو اتمان غالية لا يعرف عنها شي (ولن) الجلف المجرم البليد..بالفم المليان قال انه المجلس العسكري شريك اصيل في الثورة.

يا بليد يا الروحك عميانة وعقلك مطلي بالغراء. الشركاء من جيش السودان هم فقط حامد وإخوانه واشباهه.. هم الشرفاء، شرف لن تعرفه، هم بواسل بسالة لا يستوعبها امثالك الخنوعين.

٦ تموز/ يوليو

قضيت ساعات طويلة (ولسه ما خلصت) بردّ على رسائل طيبة بتطمئن وبتسأل. ورسائل من اخوات واخوان من بلاد مختلفة حتى بعضهم / ن جمعتني بيهم ورشة عمل او مهرجان ومحافل مختلفة ويمكن لاقيتم مرة وحدة بس..

ولكن يظل همنا مشترك وواحد.

كشعوب بينا رابط اصيل قوي باقي واحنا باقون للأبد. أدركت اكتر ان البشر، الشعب، الناس هم راس مال البلاد والامم وامنها وامانها وامان وسند بعض.

الناس البتصحى تفكر كيف ممكن تمد ايديها وتشيل الهمّ وتزيحو وتخلق مكان للامل وللرحمة ولكل القالو لينا عنه مستحيل وصعب وسازج.

احنا بنشبه بعض شديد رغم الاختلاف وأحيانا حتى الخلافات. احنا الرهان الرابح.

باقون ومكملين ولو بعد حين وحتى لو انجبرنا على شي من الهدنة او تغيير ادواتنا او اننا نرجع خطوات ونعيد النظر...

ما شعرت بقوة ودعم قدر الشَعَرت بيه بعد التجربة الصعبة الفاتت.

إذا التجربة في حد ذاتا ادّتني قوة. فالناس زادوني يقين واكّدوه.

كلي امتنان ليكم / ن وللقدر وان كان قاسي

شكرا للأبد يا خالد ع الصورة.

Khalid Awad

من اخر الصور في أحَبّ مكان. بيتنا أرض الاعتصام.

وفي قلبي شوق لينا كلنا واحنا هناك ولاهل شارع الكلينك، وصباحاتنا الطيبة العنيدة الكلها امل ومشاغبة وشيطنة وحراسة ونقاشات وشكل.

مشتاقة ليكم / ن شديد.

واكتر حاجة واجعة روحي اننا ما لحقنا نسلّم على بعض. ولا اننا نعاين على المكان مرة أخيرة قبل تغيير ملامحه. لكن اكيد بيلمنا تاني البقى بينا.

٦ حزيران/ يونيو

كتبت رباب حكيم: تكلمت من شوية مع اريج:

بعد الفيديو الأخير إللي نزّلته أريج. (تتحدث فيه عن حصار عدد من المتظاهرين في مبنى قدام مدينة البشير الطبّية) دخلوا لهم عساكر وبدأوا يضربوا نار في حيطان الغرفة وضربوهم ضرب مبرح بعصيان حديد، ضرب متواصل استمر لأكتر من ٤٠ دقيقة على أقل تقدير.

أريج و توته وباقي البنات مصابات وبيتعالجوا في بيت احداهن.

أخدوا منهم التليفونات، ده غير إن النت أصلا مقطوع. عشان كده أريج مش عارفه تتواصل.

أريج وكل الباقيات ح يبقوا أحسن وأصلب وأبهى من الأول. ح يحكوا لنا و يكتبوا شهاداتهن.

أريج صوتها حزين، قالت لي: اكتبوا.. ما توقفوا كتابة، الأمل دلوقت كله فيكم أنتوا إللي بره. إحنا متكمّمين.

٦ آب/ اغسطس

لا روح سلمت بعض الناس الما كانو موجودين وكت فض الاعتصام كانو بسألونا / يقولو لينا: ان شا الله بس ما تكونو انضربتو شديد. كنت استغرب السؤال ده بشكل. معقولة جرم وقتل ومجزرة زي دي يكون الناس الكانو موجودين لحظة ما حصلت، حتى لو نجوا، معقولة بس يكونو اخدو ليهم سوطين ولا شحطة شحطتين. حتى لو الجسم سليم ما فيه خدشة الما انضرب في جسمو انضربت روحو واتهرست الما مات ماتت روحو. الما اغتصب اغتصبت روحو. مافي زول كان جُوّا ممكن روحو تكون سليمة وبخير حتى لو كان جسدو سليم. الانترنت رِجع، ان شا الله البسألو السؤال ده وشَبَهه يكونو شافوا الحَصَل وبعد كده يرأفو بينا وما يقولو لينا كلام زي ده. لانه فعلا ما بنعرف نرد نقول شنو.

على جنب. انا بجد اسفة لكن لسه ما قادرة أخد وودّي وأردّ على كل الرسائل. بس ربنا يعلم تقديري ليها واثرها الطيب على نفسي. تسلمو.